൪൬൯. മഹാകണ്ഹജാതകം (൬)

൬൧. കണ്ഹോ കണ്ഹോ ച ഘോരോ ച, സുക്കദാഠോ പഭാസവാ [പതാപവാ (സീ. സ്യാ. പീ.)];

ബദ്ധോ പഞ്ചഹി രജ്ജൂഹി, കിം രവി [ധീര (സീ. പീ.), വീര (സ്യാ.)] സുനഖോ തവ.

൬൨. നായം മിഗാനമത്ഥായ, ഉസീനക [ഉസീനര (സീ. പീ.), ഉസീന്നര (സ്യാ.)] ഭവിസ്സതി;

മനുസ്സാനം അനയോ ഹുത്വാ, തദാ കണ്ഹോ പമോക്ഖതി.

൬൩. പത്തഹത്ഥാ സമണകാ, മുണ്ഡാ സങ്ഘാടിപാരുതാ;

നങ്ഗലേഹി കസിസ്സന്തി, തദാ കണ്ഹോ പമോക്ഖതി.

൬൪. തപസ്സിനിയോ [തപനീയാ (ക.) ദുതിയന്തപദാനി ഹേതാനി] പബ്ബജിതാ, മുണ്ഡാ സങ്ഘാടിപാരുതാ;

യദാ ലോകേ ഗമിസ്സന്തി, തദാ കണ്ഹോ പമോക്ഖതി.

൬൫. ദീഘോത്തരോട്ഠാ ജടിലാ, പങ്കദന്താ രജസ്സിരാ;

ഇണം ചോദായ [വോദായ (സീ. പീ.), ചോദയ (സ്യാ.)] ഗച്ഛന്തി, തദാ കണ്ഹോ പമോക്ഖതി.

൬൬. അധിച്ച വേദേ [വേദം (ക.)] സാവിത്തിം, യഞ്ഞതന്തഞ്ച [തന്ത്രഞ്ച (സീ. സ്യാ. പീ.)] ബ്രാഹ്മണാ;

ഭതികായ യജിസ്സന്തി, തദാ കണ്ഹോ പമോക്ഖതി.

൬൭. മാതരം പിതരഞ്ചാപി, ജിണ്ണകം ഗതയോബ്ബനം;

പഹൂ സന്തോ [സന്താ (സീ.)] ന ഭരന്തി, തദാ കണ്ഹോ പമോക്ഖതി.

൬൮. മാതരം പിതരഞ്ചാപി, ജിണ്ണകം ഗതയോബ്ബനം;

ബാലാ തുമ്ഹേതി വക്ഖന്തി, തദാ കണ്ഹോ പമോക്ഖതി.

൬൯. ആചരിയഭരിയം സഖിം [ആചരിയഭരിയം സഖാഭരിയം (സീ. പീ.)], മാതുലാനിം പിതുച്ഛകിം [പിതുച്ഛയം (സീ.), പിതുച്ഛസം (പീ.)];

യദാ ലോകേ ഗമിസ്സന്തി, തദാ കണ്ഹോ പമോക്ഖതി.

൭൦. അസിചമ്മം ഗഹേത്വാന, ഖഗ്ഗം പഗ്ഗയ്ഹ ബ്രാഹ്മണാ;

പന്ഥഘാതം കരിസ്സന്തി, തദാ കണ്ഹോ പമോക്ഖതി.

൭൧. സുക്കച്ഛവീ വേധവേരാ, ഥൂലബാഹൂ അപാതുഭാ;

മിത്തഭേദം കരിസ്സന്തി, തദാ കണ്ഹോ പമോക്ഖതി.

൭൨. മായാവിനോ നേകതികാ, അസപ്പുരിസചിന്തകാ;

യദാ ലോകേ ഭവിസ്സന്തി, തദാ കണ്ഹോ പമോക്ഖതീതി.

മഹാകണ്ഹജാതകം ഛട്ഠം.