൯. അപായിമ്ഹവഗ്ഗോ

൮൧. അപായിമ്ഹ അനച്ചിമ്ഹ, അഗായിമ്ഹ രുദിമ്ഹ ച;

വിസഞ്ഞികരണിം പിത്വാ [പീത്വാ (സീ. സ്യാ. പീ.)], ദിട്ഠാ നാഹുമ്ഹ വാനരാതി.

സുരാപാനജാതകം പഠമം.

൮൨. അതിക്കമ്മ രമണകം, സദാമത്തഞ്ച ദൂഭകം;

സ്വാസി പാസാണമാസീനോ, യസ്മാ ജീവം ന മോക്ഖസീതി.

മിത്തവിന്ദകജാതകം ദുതിയം.

൮൩. മിത്തോ ഹവേ സത്തപദേന ഹോതി, സഹായോ പന ദ്വാദസകേന ഹോതി;

മാസഡ്ഢമാസേന ച ഞാതി ഹോതി, തതുത്തരിം അത്തസമോപി ഹോതി;

സോഹം കഥം അത്തസുഖസ്സ ഹേതു, ചിരസന്ഥുതം [ചിരസന്ധവം (ക.), ചിരസത്ഥുനം (പീ.)] കാളകണ്ണിം ജഹേയ്യന്തി.

കാലകണ്ണിജാതകം തതിയം.

൮൪. ആരോഗ്യമിച്ഛേ പരമഞ്ച ലാഭം, സീലഞ്ച വുദ്ധാനുമതം സുതഞ്ച;

ധമ്മാനുവത്തീ ച അലീനതാ ച, അത്ഥസ്സ ദ്വാരാ പമുഖാ ഛളേതേതി.

അത്ഥസ്സദ്വാരജാതകം ചതുത്ഥം.

൮൫. ആയതിം ദോസം നാഞ്ഞായ, യോ കാമേ പടിസേവതി;

വിപാകന്തേ ഹനന്തി നം, കിംപക്കമിവ ഭക്ഖിതന്തി.

കിംപക്കജാതകം പഞ്ചമം.

൮൬. സീലം കിരേവ കല്യാണം, സീലം ലോകേ അനുത്തരം;

പസ്സ ഘോരവിസോ നാഗോ, സീലവാതി ന ഹഞ്ഞതീതി.

സീലവീമംസകജാതകം ഛട്ഠം.

൮൭. യസ്സ മങ്ഗലാ സമൂഹതാസേ [സമൂഹതാ (സീ. സ്യാ. പീ. സു. നി. ൩൬൨], ഉപ്പാതാ [ഉപ്പാദാ (പീ.)] സുപിനാ ച ലക്ഖണാ ച;

സോ [സ (സീ. പീ. ക.)] മങ്ഗലദോസവീതിവത്തോ, യുഗയോഗാധിഗതോ ന ജാതുമേതീതി.

മങ്ഗലജാതകം സത്തമം.

൮൮. കല്യാണിമേവ മുഞ്ചേയ്യ, ന ഹി മുഞ്ചേയ്യ പാപികം;

മോക്ഖോ കല്യാണിയാ സാധു, മുത്വാ തപ്പതി പാപികന്തി.

സാരമ്ഭജാതകം അട്ഠമം.

൮൯. വാചാവ കിര തേ ആസി, സണ്ഹാ സഖിലഭാണിനോ;

തിണമത്തേ അസജ്ജിത്ഥോ, നോ ച നിക്ഖസതം ഹരന്തി.

കുഹകജാതകം നവമം.

൯൦. യോ പുബ്ബേ കതകല്യാണോ, കതത്ഥോ നാവബുജ്ഝതി;

പച്ഛാ കിച്ചേ സമുപ്പന്നേ, കത്താരം നാധിഗച്ഛതീതി.

അകതഞ്ഞുജാതകം ദസമം.

അപായിമ്ഹവഗ്ഗോ നവമോ.

തസ്സുദ്ദാനം –

അപായിമ്ഹ ച ദൂഭകം സത്തപദം, ഛളദ്വര ച ആയതിനാ ച പുന;

അഹിസീലവ മങ്ഗലി പാപികസ്സാ, സതംനിക്ഖ കതത്ഥവരേന ദസാതി.