൧൦. ലിത്തവഗ്ഗോ

൯൧. ലിത്തം പരമേന തേജസാ, ഗിലമക്ഖം പുരിസോ ന ബുജ്ഝതി;

ഗില രേ ഗില പാപധുത്തക, പച്ഛാ തേ കടുകം ഭവിസ്സതീതി.

ലിത്തജാതകം പഠമം.

൯൨. ഉക്കട്ഠേ സൂരമിച്ഛന്തി, മന്തീസു അകുതൂഹലം;

പിയഞ്ച അന്നപാനമ്ഹി, അത്ഥേ ജാതേ ച പണ്ഡിതന്തി.

മഹാസാരജാതകം ദുതിയം.

൯൩. ന വിസ്സസേ അവിസ്സത്ഥേ, വിസ്സത്ഥേപി ന വിസ്സസേ;

വിസ്സാസാ ഭയമന്വേതി, സീഹംവ മിഗമാതുകാതി [മിഗമാതുയാ (ക.)].

വിസാസഭോജനജാതകം തതിയം.

൯൪. സോതത്തോ സോസിന്ദോ [സോസീതോ (സീ. സ്യാ. പീ.), സോസിനോ (ക.)] ചേവ, ഏകോ ഭിംസനകേ വനേ;

നഗ്ഗോ ന ചഗ്ഗിമാസീനോ, ഏസനാപസുതോ മുനീതി.

ലോമഹംസജാതകം ചതുത്ഥം.

൯൫. അനിച്ചാ വത സങ്ഖാരാ, ഉപ്പാദവയധമ്മിനോ;

ഉപ്പജ്ജിത്വാ നിരുജ്ഝന്തി, തേസം വൂപസമോ സുഖോതി.

മഹാസുദസ്സനജാതകം പഞ്ചമം.

൯൬. സമതിത്തികം അനവസേകം, തേലപത്തം യഥാ പരിഹരേയ്യ;

ഏവം സചിത്തമനുരക്ഖേ, പത്ഥയാനോ ദിസം അഗതപുബ്ബന്തി.

തേലപത്തജാതകം ഛട്ഠം.

൯൭. ജീവകഞ്ച മതം ദിസ്വാ, ധനപാലിഞ്ച ദുഗ്ഗതം;

പന്ഥകഞ്ച വനേ മൂള്ഹം, പാപകോ പുനരാഗതോതി.

നാമസിദ്ധിജാതകം സത്തമം.

൯൮. സാധു ഖോ പണ്ഡിതോ നാമ, ന ത്വേവ അതിപണ്ഡിതോ;

അതിപണ്ഡിതേന പുത്തേന, മനമ്ഹി ഉപകൂളിതോതി [ഉപകൂലിതോതി (സീ.), ഉപകുട്ഠിതോതി (സ്യാ.), ഉപകുടിതോ (ക.)].

കൂടവാണിജജാതകം അട്ഠമം.

൯൯. പരോസഹസ്സമ്പി സമാഗതാനം, കന്ദേയ്യും തേ വസ്സസതം അപഞ്ഞാ;

ഏകോവ സേയ്യോ പുരിസോ സപഞ്ഞോ, യോ ഭാസിതസ്സ വിജാനാതി അത്ഥന്തി.

പരോസഹസ്സജാതകം നവമം.

൧൦൦. അസാതം സാതരൂപേന, പിയരൂപേന അപ്പിയം;

ദുക്ഖം സുഖസ്സ രൂപേന, പമത്തമതിവത്തതീതി.

അസാതരൂപജാതകം ദസമം.

ലിത്തവഗ്ഗോ ദസമോ.

തസ്സുദ്ദാനം –

ഗിലമക്ഖകുതൂഹല മാതുകസ്സാ, മുനിനാ ച അനിച്ചത പത്തവരം;

ധനപാലിവരോ അതിപണ്ഡിതകോ, സപരോസഹസ്സഅസാതദസാതി.

മജ്ഝിമോ പണ്ണാസകോ.