൧൧. പരോസതവഗ്ഗോ

൧൦൧. പരോസതം ചേപി സമാഗതാനം, ഝായേയ്യും തേ വസ്സസതം അപഞ്ഞാ;

ഏകോവ സേയ്യോ പുരിസോ സപഞ്ഞോ, യോ ഭാസിതസ്സ വിജാനാതി അത്ഥന്തി.

പരോസതജാതകം പഠമം.

൧൦൨. യോ ദുക്ഖഫുട്ഠായ ഭവേയ്യ താണം, സോ മേ പിതാ ദുബ്ഭി [ദൂഭി (സീ. പീ.)] വനേ കരോതി;

സാ കസ്സ കന്ദാമി വനസ്സ മജ്ഝേ, യോ തായിതാ സോ സഹസം [സഹസാ (സീ. സ്യാ. പീ.)] കരോതീതി.

പണ്ണികജാതകം ദുതിയം.

൧൦൩. യത്ഥ വേരീ നിവിസതി [നിവസതി (സീ. ക.)], ന വസേ തത്ഥ പണ്ഡിതോ;

ഏകരത്തം ദിരത്തം വാ, ദുക്ഖം വസതി വേരിസൂതി.

വേരിജാതകം തതിയം.

൧൦൪. ചതുബ്ഭി അട്ഠജ്ഝഗമാ, അട്ഠാഹിപി ച സോളസ;

സോളസാഹി ച ബാത്തിംസ [ബത്തിംസ (സീ. സ്യാ. പീ.)], അത്രിച്ഛം ചക്കമാസദോ;

ഇച്ഛാഹതസ്സ പോസസ്സ, ചക്കം ഭമതി മത്ഥകേതി.

മിത്തവിന്ദകജാതകം ചതുത്ഥം.

൧൦൫. ബഹുമ്പേതം വനേ കട്ഠം, വാതോ ഭഞ്ജതി ദുബ്ബലം;

തസ്സ ചേ ഭായസീ നാഗ, കിസോ നൂന ഭവിസ്സസീതി.

ദുബ്ബലകട്ഠജാതകം പഞ്ചമം.

൧൦൬. സുഖം വത മം ജീവന്തം [സുഖകം വത ജീവം (ക.)], പചമാനാ ഉദഞ്ചനീ;

ചോരീ ജായപ്പവാദേന, തേലം ലോണഞ്ച യാചതീതി.

ഉദഞ്ചനീജാതകം ഛട്ഠം.

൧൦൭. സാധു ഖോ സിപ്പകം നാമ, അപി യാദിസ കീദിസം;

പസ്സ ഖഞ്ജപ്പഹാരേന, ലദ്ധാ ഗാമാ ചതുദ്ദിസാതി.

സാലിത്തകജാതകം സത്തമം.

൧൦൮. സിക്ഖേയ്യ സിക്ഖിതബ്ബാനി, സന്തി തച്ഛന്ദിനോ [സച്ഛന്ദിനോ (സീ. പീ.)] ജനാ;

ബാഹിയാ ഹി [പി (സീ. സ്യാ. പീ.)] സുഹന്നേന, രാജാനമഭിരാധയീതി.

ബാഹിയജാതകം അട്ഠമം.

൧൦൯. യഥന്നോ പുരിസോ ഹോതി, തഥന്നാ തസ്സ ദേവതാ;

ആഹരേതം കുണ്ഡപൂവം [കണം പൂവം (സീ. പീ.)], മാ മേ ഭാഗം വിനാസയാതി.

കുണ്ഡപൂവജാതകം നവമം.

൧൧൦. സബ്ബസംഹാരകോ [സബ്ബസാഹാരകോ (ക.)] നത്ഥി, സുദ്ധം കങ്ഗു പവായതി;

അലികം ഭായതിയം ധുത്തീ, സച്ചമാഹ മഹല്ലികാതി.

സബ്ബസംഹാരകപഞ്ഹജാതകം ദസമം.

പരോസതവഗ്ഗോ ഏകാദസമോ.

തസ്സുദ്ദാനം –

സപരോസത തായിത വേരീ പുന, ഭമചക്കഥ നാഗസിരിവ്ഹയനോ;

സുഖകഞ്ച വത സിപ്പക ബാഹിയാ, കുണ്ഡപൂവ മഹല്ലികകാ ച ദസാതി.