൮. വരുണവഗ്ഗോ

൭൧. യോ പുബ്ബേ കരണീയാനി, പച്ഛാ സോ കാതുമിച്ഛതി;

വരുണകട്ഠ [വരണകട്ഠ (സീ. പീ.)] ഭഞ്ജോവ, സ പച്ഛാ മനുതപ്പതീതി.

വരുണജാതകം പഠമം.

൭൨. അകതഞ്ഞുസ്സ പോസസ്സ, നിച്ചം വിവരദസ്സിനോ;

സബ്ബം ചേ പഥവിം [പഠവിം (സീ. സ്യാ. പീ.)] ദജ്ജാ, നേവ നം അഭിരാധയേതി.

സീലവഹത്ഥിജാതകം ദുതിയം.

൭൩. സച്ചം കിരേവമാഹംസു, നരാ ഏകച്ചിയാ ഇധ;

കട്ഠം നിപ്ലവിതം [വിപ്ലാവിതം (സീ. പീ.)] സേയ്യോ, ന ത്വേവേകച്ചിയോ നരോതി.

സച്ചംകിരജാതകം തതിയം.

൭൪. സാധൂ സമ്ബഹുലാ ഞാതീ, അപി രുക്ഖാ അരഞ്ഞജാ;

വാതോ വഹതി ഏകട്ഠം, ബ്രഹന്തമ്പി വനപ്പതിന്തി.

രുക്ഖധമ്മജാതകം ചതുത്ഥം.

൭൫. അഭിത്ഥനയ പജ്ജുന്ന, നിധിം കാകസ്സ നാസയ;

കാകം സോകായ രന്ധേഹി, മഞ്ച സോകാ പമോചയാതി.

മച്ഛജാതകം പഞ്ചമം.

൭൬. അസങ്കിയോമ്ഹി ഗാമമ്ഹി, അരഞ്ഞേ നത്ഥി മേ ഭയം;

ഉജും മഗ്ഗം സമാരൂള്ഹോ, മേത്തായ കരുണായ ചാതി.

അസങ്കിയജാതകം ഛട്ഠം.

൭൭. ഉസഭാ രുക്ഖാ ഗാവിയോ ഗവാ ച, അസ്സോ കംസോ സിങ്ഗാലീ [സിഗാസീ (സീ. സ്യാ. പീ.)] ച കുമ്ഭോ;

പോക്ഖരണീ ച അപാകചന്ദനം, ലാബൂനി സീദന്തി സിലാ പ്ലവന്തി.

മണ്ഡൂകിയോ കണ്ഹസപ്പേ ഗിലന്തി, കാകം സുപണ്ണാ പരിവാരയന്തി;

തസാ വകാ ഏളകാനം ഭയാഹി, വിപരിയാസോ [വിപരിയായോ (സ്യാ. ക.)] വത്തതി നയിധ മത്ഥീതി.

മഹാസുപിനജാതകം സത്തമം.

൭൮. ഉഭോ ഖഞ്ജാ ഉഭോ കുണീ, ഉഭോ വിസമചക്ഖുകാ [ചക്ഖുലാ (സീ. പീ.)];

ഉഭിന്നം പിളകാ [പീളകാ (സ്യാ.)] ജാതാ, നാഹം പസ്സാമി ഇല്ലിസന്തി.

ഇല്ലിസജാതകം അട്ഠമം.

൭൯. യതോ വിലുത്താ ച ഹതാ ച ഗാവോ, ദഡ്ഢാനി ഗേഹാനി ജനോ ച നീതോ;

അഥാഗമാ പുത്തഹതായ പുത്തോ, ഖരസ്സരം ഡിണ്ഡിമം [ദേണ്ഡിമം (സീ. സ്യാ. പീ.), ഡിന്ദിമം (ക.)] വാദയന്തോതി.

ഖരസ്സരജാതകം നവമം.

൮൦. യം തേ പവികത്ഥിതം പുരേ, അഥ തേ പൂതിസരാ സജന്തി പച്ഛാ;

ഉഭയം ന സമേതി ഭീമസേന, യുദ്ധകഥാ ച ഇദഞ്ച തേ വിഹഞ്ഞന്തി.

ഭീമസേനജാതകം ദസമം.

വരുണവഗ്ഗോ [വരണവഗ്ഗോ (സീ. പീ.)] അട്ഠമോ.

തസ്സുദ്ദാനം –

വരുണാ അകതഞ്ഞൂവരേ തു സച്ചവരം, സവനപ്പതിനാ ച അഭിത്ഥനയ;

കരുണായ സിലാപ്ലവ ഇല്ലിസതോ, പുന ഡിണ്ഡിമപൂതിസരേന ദസാതി.