൧൫. കകണ്ടകവഗ്ഗോ

൧൪൧. ഗോധജാതകം

൧൪൧. ന പാപജനസംസേവീ, അച്ചന്തസുഖമേധതി;

ഗോധാകുലം [ഗോധക്കുലം (ക.)] കകണ്ടാവ [കകണ്ടകാ (ക.)], കലിം പാപേതി അത്തനന്തി.

ഗോധജാതകം പഠമം.

൧൪൨. സിങ്ഗാലജാതകം

൧൪൨. ഏതഞ്ഹി തേ ദുരാജാനം, യം സേസി മതസായികം;

യസ്സ തേ കഡ്ഢമാനസ്സ, ഹത്ഥാ ദണ്ഡോ ന മുച്ചതീതി.

സിങ്ഗാലജാതകം ദുതിയം.

൧൪൩. വിരോചജാതകം

൧൪൩. ലസീ ച തേ നിപ്ഫലിതാ, മത്ഥകോ ച പദാലിതോ [വിദാലിതോ (സീ. പീ.)];

സബ്ബാ തേ ഫാസുകാ ഭഗ്ഗാ, അജ്ജ ഖോ ത്വം വിരോചസീതി.

വിരോചജാതകം തതിയം.

൧൪൪. നങ്ഗുട്ഠജാതകം

൧൪൪. ബഹുമ്പേതം അസബ്ഭി [ബഹുപേതമസബ്ഭി (ക.)] ജാതവേദ, യം തം വാലധിനാഭിപൂജയാമ;

മംസാരഹസ്സ നത്ഥജ്ജ മംസം, നങ്ഗുട്ഠമ്പി ഭവം പടിഗ്ഗഹാതൂതി.

നങ്ഗുട്ഠജാതകം ചതുത്ഥം.

൧൪൫. രാധജാതകം

൧൪൫. ന ത്വം രാധ വിജാനാസി, അഡ്ഢരത്തേ അനാഗതേ;

അബ്യയതം [അബ്യായതം (സീ. സ്യാ. പീ.), അബ്യത്തതം (?)] വിലപസി, വിരത്താ കോസിയായനേതി.

രാധജാതകം പഞ്ചമം.

൧൪൬. സമുദ്ദകാകജാതകം

൧൪൬. അപി നു ഹനുകാ സന്താ, മുഖഞ്ച പരിസുസ്സതി;

ഓരമാമ ന പാരേമ, പൂരതേവ മഹോദധീതി.

സമുദ്ദകാകജാതകം ഛട്ഠം.

൧൪൭. പുപ്ഫരത്തജാതകം

൧൪൭. നയിദം ദുക്ഖം അദും ദുക്ഖം, യം മം തുദതി വായസോ;

യം സാമാ പുപ്ഫരത്തേന, കത്തികം നാനുഭോസ്സതീതി.

പുപ്ഫരത്തജാതകം സത്തമം.

൧൪൮. സിങ്ഗാലജാതകം

൧൪൮. നാഹം പുനം ന ച പുനം, ന ചാപി അപുനപ്പുനം;

ഹത്ഥിബോന്ദിം പവേക്ഖാമി, തഥാ ഹി ഭയതജ്ജിതോതി.

സിങ്ഗാലജാതകം അട്ഠമം.

൧൪൯. ഏകപണ്ണജാതകം

൧൪൯. ഏകപണ്ണോ അയം രുക്ഖോ, ന ഭൂമ്യാ ചതുരങ്ഗുലോ;

ഫലേന വിസകപ്പേന, മഹായം കിം ഭവിസ്സതീതി.

ഏകപണ്ണജാതകം നവമം.

൧൫൦. സഞ്ജീവജാതകം

൧൫൦. അസന്തം യോ പഗ്ഗണ്ഹാതി, അസന്തം ചൂപസേവതി;

തമേവ ഘാസം കുരുതേ, ബ്യഗ്ഘോ സഞ്ജീവകോ യഥാതി.

സഞ്ജീവജാതകം ദസമം.

കകണ്ടക [പാപസേവന (ക.)] വഗ്ഗോ പന്നരസമോ.

തസ്സുദ്ദാനം –

സുഖമേധതി ദണ്ഡവരോ ച പുന, ലസി വാലധി പഞ്ചമരാധവരോ;

സമഹോദധി കത്തിക ബോന്ദി പുന, ചതുരങ്ഗുലബ്യഗ്ഘവരേന ദസാതി.

(ഉപരിമോ പണ്ണാസകോ.) [( ) സീഹളപോത്ഥകേയേവ ദിസ്സതി]

അഥ വഗ്ഗുദ്ദാനം –

അപണ്ണകം സീലവഗ്ഗകുരുങ്ഗ, കുലാവകം അത്ഥകാമേന പഞ്ചമം;

ആസീസോ ഇത്ഥിവരുണം അപായി, ലിത്തവഗ്ഗേന തേ ദസ;

പരോസതം ഹംചി കുസനാളി [ഹംസി സരിക്ഖം (സബ്ബത്ഥ)], അസമ്പദം കകണ്ടകവഗ്ഗോ.

ഏകനിപാതമ്ഹിലങ്കതന്തി.

ഏകകനിപാതം നിട്ഠിതം.