൧൪. അസമ്പദാനവഗ്ഗോ

൧൩൧. അസമ്പദാനേനിതരീതരസ്സ, ബാലസ്സ മിത്താനി കലീ ഭവന്തി;

തസ്മാ ഹരാമി ഭുസം അഡ്ഢമാനം, മാ മേ മിത്തി ജീയിത്ഥ സസ്സതായന്തി.

അസമ്പദാനജാതകം പഠമം.

൧൩൨. കുസലൂപദേസേ ധിതിയാ ദള്ഹായ ച, അനിവത്തിതത്താഭയഭീരുതായ [അവത്ഥിതത്താഭയഭീരുതായ (സീ. സ്യാ. പീ.)] ച;

ന രക്ഖസീനം വസമാഗമിമ്ഹസേ, സ സോത്ഥിഭാവോ മഹതാ ഭയേന മേതി.

ഭീരുക [പഞ്ചഗരുക (സീ. പീ.), പഞ്ചഭീരുക (സ്യാ.), അഭയഭീരുത§(?)] ജാതകം ദുതിയം.

൧൩൩. ഖേമം യഹിം തത്ഥ അരീ ഉദീരിതോ [അരി ഉദ്ധരിതോ (ക.)], ദകസ്സ മജ്ഝേ ജലതേ ഘതാസനോ;

ന അജ്ജ വാസോ മഹിയാ മഹീരുഹേ, ദിസാ ഭജവ്ഹോ സരണാജ്ജ നോ ഭയന്തി.

ഘതാസനജാതകം തതിയം.

൧൩൪. യേ സഞ്ഞിനോ തേപി ദുഗ്ഗതാ, യേപി അസഞ്ഞിനോ തേപി ദുഗ്ഗതാ;

ഏതം ഉഭയം വിവജ്ജയ, തം സമാപത്തിസുഖം അനങ്ഗണന്തി.

ഝാനസോധനജാതകം ചതുത്ഥം.

൧൩൫. ചന്ദാഭം സൂരിയാഭഞ്ച, യോധ പഞ്ഞായ ഗാധതി.

അവിതക്കേന ഝാനേന, ഹോതി ആഭസ്സരൂപഗോതി.

ചന്ദാഭജാതകം പഞ്ചമം.

൧൩൬. യം ലദ്ധം തേന തുട്ഠബ്ബം, അതിലോഭോ ഹി പാപകോ;

ഹംസരാജം ഗഹേത്വാന, സുവണ്ണാ പരിഹായഥാതി.

സുവണ്ണഹംസജാതകം ഛട്ഠം.

൧൩൭. യത്ഥേകോ ലഭതേ ബബ്ബു, ദുതിയോ തത്ഥ ജായതി;

തതിയോ ച ചതുത്ഥോ ച, ഇദം തേ ബബ്ബുകാ ബിലന്തി.

ബബ്ബുജാതകം സത്തമം.

൧൩൮. കിം തേ ജടാഹി ദുമ്മേധ, കിം തേ അജിനസാടിയാ;

അബ്ഭന്തരം തേ ഗഹനം, ബാഹിരം പരിമജ്ജസീതി.

ഗോധജാതകം അട്ഠമം.

൧൩൯. അക്ഖീ ഭിന്നാ പടോ നട്ഠോ, സഖിഗേഹേ ച ഭണ്ഡനം;

ഉഭതോ പദുട്ഠാ കമ്മന്താ [പദുട്ഠകമ്മന്തോ (സീ.), പദുട്ഠോ കമ്മന്തോ (പീ.)], ഉദകമ്ഹി ഥലമ്ഹി ചാതി.

ഉഭതോഭട്ഠജാതകം നവമം.

൧൪൦. നിച്ചം ഉബ്ബിഗ്ഗഹദയാ, സബ്ബലോകവിഹേസകാ;

തസ്മാ നേസം വസാ നത്ഥി, കാകാനമ്ഹാക [കാകാനസ്മാക (സീ. സ്യാ. പീ.)] ഞാതിനന്തി.

കാകജാതകം ദസമം.

അസമ്പദാനവഗ്ഗോ ചുദ്ദസമോ.

തസ്സുദ്ദാനം –

ഇതരീതര രക്ഖസി ഖേമിയോ ച, പരോസതപഞ്ഹേന ആഭസ്സരോ പുന;

അഥ ഹംസവരുത്തമബബ്ബുജടം, പടനട്ഠക കാകവരേന ദസാതി.