൧൩. കുസനാളിവഗ്ഗോ

൧൨൧. കരേ സരിക്ഖോ അഥ വാപി സേട്ഠോ, നിഹീനകോ വാപി കരേയ്യ ഏകോ;

കരേയ്യുമേതേ [കരേയ്യും തേ (സീ. പീ.)] ബ്യസനേ ഉത്തമത്ഥം, യഥാ അഹം കുസനാളി രുചായന്തി.

കുസനാളിജാതകം പഠമം.

൧൨൨. യസം ലദ്ധാന ദുമ്മേധോ, അനത്ഥം ചരതി അത്തനോ;

അത്തനോ ച പരേസഞ്ച, ഹിംസായ പടിപജ്ജതീതി.

ദുമ്മേധജാതകം ദുതിയം.

൧൨൩. അസബ്ബത്ഥഗാമിം വാചം, ബാലോ സബ്ബത്ഥ ഭാസതി;

നായം ദധിം വേദി ന [ന വേദി (ക.)] നങ്ഗലീസം, ദധിപ്പയം [ദധിമ്പയം (സീ. പീ.)] മഞ്ഞതി നങ്ഗലീസന്തി.

നങ്ഗലീസജാതകം തതിയം.

൧൨൪. വായമേഥേവ പുരിസോ, ന നിബ്ബിന്ദേയ്യ പണ്ഡിതോ;

വായാമസ്സ ഫലം പസ്സ, ഭുത്താ അമ്ബാ അനീതിഹന്തി.

അമ്ബജാതകം ചതുത്ഥം.

൧൨൫. ബഹുമ്പി സോ വികത്ഥേയ്യ, അഞ്ഞം ജനപദം ഗതോ;

അന്വാഗന്ത്വാന ദൂസേയ്യ, ഭുഞ്ജ ഭോഗേ കടാഹകാതി.

കടാഹകജാതകം പഞ്ചമം.

൧൨൬. തദേവേകസ്സ [തഥേവേകസ്സ (സീ. സ്യാ. പീ. അട്ഠ. മൂലപാഠോ)] കല്യാണം, തദേവേകസ്സ പാപകം;

തസ്മാ സബ്ബം ന കല്യാണം, സബ്ബം വാപി ന പാപകന്തി.

അസിലക്ഖണജാതകം ഛട്ഠം.

൧൨൭. തേ ദേസാ താനി വത്ഥൂനി, അഹഞ്ച വനഗോചരോ;

അനുവിച്ച ഖോ തം ഗണ്ഹേയ്യും, പിവ [പിപ (സീ. പീ.)] ഖീരം കലണ്ഡുകാതി.

കലണ്ഡുകജാതകം സത്തമം.

൧൨൮. യോ വേ ധമ്മം ധജം [ധമ്മധജം (സ്യാ. പീ. ക.)] കത്വാ, നിഗൂള്ഹോ പാപമാചരേ;

വിസ്സാസയിത്വാ ഭൂതാനി, ബിളാരം നാമ തം വതന്തി.

ബിളാരവതജാതകം അട്ഠമം.

൧൨൯. നായം സിഖാ പുഞ്ഞഹേതു, ഘാസഹേതു അയം സിഖാ;

നാങ്ഗുട്ഠഗണനം യാതി, അലം തേ ഹോതു അഗ്ഗികാതി.

അഗ്ഗികഭാരദ്വാജജാതകം നവമം.

൧൩൦. യഥാ വാചാ ച ഭുഞ്ജസ്സു, യഥാ ഭുത്തഞ്ച ബ്യാഹര;

ഉഭയം തേ ന സമേതി, വാചാ ഭുത്തഞ്ച കോസിയേതി.

കോസിയജാതകം ദസമം.

കുസനാളിവഗ്ഗോ [സരിക്ഖവഗ്ഗോ (ക.)] തേരസമോ.

തസ്സുദ്ദാനം –

കുസനാളിസിരിവ്ഹയനോ ച യസം, ദധി മമ്ബ കടാഹകപഞ്ചമകോ;

അഥ പാപക ഖീര ബിളാരവതം, സിഖി കോസിയസവ്ഹയനേന ദസാതി.