൮. അന്ധകരണസുത്തം

൮൭. വുത്തഞ്ഹേതം ഭഗവതാ, വുത്തമരഹതാതി മേ സുതം –

‘‘തയോമേ, ഭിക്ഖവേ, അകുസലവിതക്കാ അന്ധകരണാ അചക്ഖുകരണാ അഞ്ഞാണകരണാ പഞ്ഞാനിരോധികാ വിഘാതപക്ഖികാ അനിബ്ബാനസംവത്തനികാ. കതമേ തയോ? കാമവിതക്കോ, ഭിക്ഖവേ, അന്ധകരണോ അചക്ഖുകരണോ അഞ്ഞാണകരണോ പഞ്ഞാനിരോധികോ വിഘാതപക്ഖികോ അനിബ്ബാനസംവത്തനികോ. ബ്യാപാദവിതക്കോ, ഭിക്ഖവേ, അന്ധകരണോ അചക്ഖുകരണോ അഞ്ഞാണകരണോ പഞ്ഞാനിരോധികോ വിഘാതപക്ഖികോ അനിബ്ബാനസംവത്തനികോ. വിഹിംസാവിതക്കോ, ഭിക്ഖവേ, അന്ധകരണോ അചക്ഖുകരണോ അഞ്ഞാണകരണോ പഞ്ഞാനിരോധികോ വിഘാതപക്ഖികോ അനിബ്ബാനസംവത്തനികോ. ഇമേ ഖോ, ഭിക്ഖവേ, തയോ അകുസലവിതക്കാ അന്ധകരണാ അചക്ഖുകരണാ അഞ്ഞാണകരണാ പഞ്ഞാനിരോധികാ വിഘാതപക്ഖികാ അനിബ്ബാനസംവത്തനികാ.

‘‘തയോമേ, ഭിക്ഖവേ, കുസലവിതക്കാ അനന്ധകരണാ ചക്ഖുകരണാ ഞാണകരണാ പഞ്ഞാവുദ്ധികാ അവിഘാതപക്ഖികാ നിബ്ബാനസംവത്തനികാ. കതമേ തയോ? നേക്ഖമ്മവിതക്കോ, ഭിക്ഖവേ, അനന്ധകരണോ ചക്ഖുകരണോ ഞാണകരണോ പഞ്ഞാവുദ്ധികോ അവിഘാതപക്ഖികോ നിബ്ബാനസംവത്തനികോ. അബ്യാപാദവിതക്കോ, ഭിക്ഖവേ, അനന്ധകരണോ ചക്ഖുകരണോ ഞാണകരണോ പഞ്ഞാവുദ്ധികോ അവിഘാതപക്ഖികോ നിബ്ബാനസംവത്തനികോ. അവിഹിംസാവിതക്കോ, ഭിക്ഖവേ, അനന്ധകരണോ ചക്ഖുകരണോ ഞാണകരണോ പഞ്ഞാവുദ്ധികോ അവിഘാതപക്ഖികോ നിബ്ബാനസംവത്തനികോ. ഇമേ ഖോ, ഭിക്ഖവേ, തയോ കുസലവിതക്കാ അനന്ധകരണാ ചക്ഖുകരണാ ഞാണകരണാ പഞ്ഞാവുദ്ധികാ അവിഘാതപക്ഖികാ നിബ്ബാനസംവത്തനികാ’’തി. ഏതമത്ഥം ഭഗവാ അവോച. തത്ഥേതം ഇതി വുച്ചതി –

‘‘തയോ വിതക്കേ കുസലേ വിതക്കയേ, തയോ പന അകുസലേ നിരാകരേ;

സ വേ വിതക്കാനി വിചാരിതാനി, സമേതി വുട്ഠീവ രജം സമൂഹതം;

സ വേ വിതക്കൂപസമേന ചേതസാ, ഇധേവ സോ സന്തിപദം സമജ്ഝഗാ’’തി.

അയമ്പി അത്ഥോ വുത്തോ ഭഗവതാ, ഇതി മേ സുതന്തി. അട്ഠമം.