൨൪. തണ്ഹാവഗ്ഗോ

൩൩൪. മനുജസ്സ പമത്തചാരിനോ, തണ്ഹാ വഡ്ഢതി മാലുവാ വിയ;

സോ പ്ലവതീ [പ്ലവതി (സീ. പീ.), പലവേതീ (ക.), ഉപ്ലവതി (?)] ഹുരാ ഹുരം, ഫലമിച്ഛംവ വനസ്മി വാനരോ.

൩൩൫. യം ഏസാ സഹതേ ജമ്മീ, തണ്ഹാ ലോകേ വിസത്തികാ;

സോകാ തസ്സ പവഡ്ഢന്തി, അഭിവട്ഠംവ [അഭിവഡ്ഢംവ (സ്യാ.), അഭിവട്ടംവ (പീ.), അഭിവുഡ്ഢംവ (ക.)] ബീരണം.

൩൩൬. യോ ചേതം സഹതേ ജമ്മിം, തണ്ഹം ലോകേ ദുരച്ചയം;

സോകാ തമ്ഹാ പപതന്തി, ഉദബിന്ദുവ പോക്ഖരാ.

൩൩൭. തം വോ വദാമി ഭദ്ദം വോ, യാവന്തേത്ഥ സമാഗതാ;

തണ്ഹായ മൂലം ഖണഥ, ഉസീരത്ഥോവ ബീരണം;

മാ വോ നളംവ സോതോവ, മാരോ ഭഞ്ജി പുനപ്പുനം.

൩൩൮. യഥാപി മൂലേ അനുപദ്ദവേ ദള്ഹേ, ഛിന്നോപി രുക്ഖോ പുനരേവ രൂഹതി;

ഏവമ്പി തണ്ഹാനുസയേ അനൂഹതേ, നിബ്ബത്തതീ ദുക്ഖമിദം പുനപ്പുനം.

൩൩൯. യസ്സ ഛത്തിംസതി സോതാ, മനാപസവനാ ഭുസാ;

മാഹാ [വാഹാ (സീ. സ്യാ. പീ.)] വഹന്തി ദുദ്ദിട്ഠിം, സങ്കപ്പാ രാഗനിസ്സിതാ.

൩൪൦. സവന്തി സബ്ബധി സോതാ, ലതാ ഉപ്പജ്ജ [ഉബ്ഭിജ്ജ (സീ. സ്യാ. കം. പീ.)] തിട്ഠതി;

തഞ്ച ദിസ്വാ ലതം ജാതം, മൂലം പഞ്ഞായ ഛിന്ദഥ.

൩൪൧. സരിതാനി സിനേഹിതാനി ച, സോമനസ്സാനി ഭവന്തി ജന്തുനോ;

തേ സാതസിതാ സുഖേസിനോ, തേ വേ ജാതിജരൂപഗാ നരാ.

൩൪൨. തസിണായ പുരക്ഖതാ പജാ, പരിസപ്പന്തി സസോവ ബന്ധിതോ [ബാധിതോ (ബഹൂസു)];

സംയോജനസങ്ഗസത്തകാ, ദുക്ഖമുപേന്തി പുനപ്പുനം ചിരായ.

൩൪൩. തസിണായ പുരക്ഖതാ പജാ, പരിസപ്പന്തി സസോവ ബന്ധിതോ;

തസ്മാ തസിണം വിനോദയേ, ആകങ്ഖന്ത [ഭിക്ഖൂ ആകങ്ഖീ (സീ.), ഭിക്ഖു ആകങ്ഖം (സ്യാ.)] വിരാഗമത്തനോ.

൩൪൪. യോ നിബ്ബനഥോ വനാധിമുത്തോ, വനമുത്തോ വനമേവ ധാവതി;

തം പുഗ്ഗലമേഥ പസ്സഥ, മുത്തോ ബന്ധനമേവ ധാവതി.

൩൪൫. ന തം ദള്ഹം ബന്ധനമാഹു ധീരാ, യദായസം ദാരുജപബ്ബജഞ്ച [ദാരൂജം ബബ്ബജഞ്ച (സീ. പീ.)];

സാരത്തരത്താ മണികുണ്ഡലേസു, പുത്തേസു ദാരേസു ച യാ അപേക്ഖാ.

൩൪൬. ഏതം ദള്ഹം ബന്ധനമാഹു ധീരാ, ഓഹാരിനം സിഥിലം ദുപ്പമുഞ്ചം;

ഏതമ്പി ഛേത്വാന പരിബ്ബജന്തി, അനപേക്ഖിനോ കാമസുഖം പഹായ.

൩൪൭. യേ രാഗരത്താനുപതന്തി സോതം, സയംകതം മക്കടകോവ ജാലം;

ഏതമ്പി ഛേത്വാന വജന്തി ധീരാ, അനപേക്ഖിനോ സബ്ബദുക്ഖം പഹായ.

൩൪൮. മുഞ്ച പുരേ മുഞ്ച പച്ഛതോ, മജ്ഝേ മുഞ്ച ഭവസ്സ പാരഗൂ;

സബ്ബത്ഥ വിമുത്തമാനസോ, ന പുനം ജാതിജരം ഉപേഹിസി.

൩൪൯. വിതക്കമഥിതസ്സ ജന്തുനോ, തിബ്ബരാഗസ്സ സുഭാനുപസ്സിനോ;

ഭിയ്യോ തണ്ഹാ പവഡ്ഢതി, ഏസ ഖോ ദള്ഹം [ഏസ ഗാള്ഹം (ക.)] കരോതി ബന്ധനം.

൩൫൦. വിതക്കൂപസമേ ച [വിതക്കൂപസമേവ (ക.)] യോ രതോ, അസുഭം ഭാവയതേ സദാ സതോ;

ഏസ [ഏസോ (?)] ഖോ ബ്യന്തി കാഹിതി, ഏസ [ഏസോ (?)] ഛേച്ഛതി മാരബന്ധനം.

൩൫൧. നിട്ഠങ്ഗതോ അസന്താസീ, വീതതണ്ഹോ അനങ്ഗണോ;

അച്ഛിന്ദി ഭവസല്ലാനി, അന്തിമോയം സമുസ്സയോ.

൩൫൨. വീതതണ്ഹോ അനാദാനോ, നിരുത്തിപദകോവിദോ;

അക്ഖരാനം സന്നിപാതം, ജഞ്ഞാ പുബ്ബാപരാനി ച;

സ വേ ‘‘അന്തിമസാരീരോ, മഹാപഞ്ഞോ മഹാപുരിസോ’’തി വുച്ചതി.

൩൫൩. സബ്ബാഭിഭൂ സബ്ബവിദൂഹമസ്മി, സബ്ബേസു ധമ്മേസു അനൂപലിത്തോ;

സബ്ബഞ്ജഹോ തണ്ഹക്ഖയേ വിമുത്തോ, സയം അഭിഞ്ഞായ കമുദ്ദിസേയ്യം.

൩൫൪. സബ്ബദാനം ധമ്മദാനം ജിനാതി, സബ്ബരസം ധമ്മരസോ ജിനാതി;

സബ്ബരതിം ധമ്മരതി ജിനാതി, തണ്ഹക്ഖയോ സബ്ബദുക്ഖം ജിനാതി.

൩൫൫. ഹനന്തി ഭോഗാ ദുമ്മേധം, നോ ച പാരഗവേസിനോ;

ഭോഗതണ്ഹായ ദുമ്മേധോ, ഹന്തി അഞ്ഞേവ അത്തനം.

൩൫൬. തിണദോസാനി ഖേത്താനി, രാഗദോസാ അയം പജാ;

തസ്മാ ഹി വീതരാഗേസു, ദിന്നം ഹോതി മഹപ്ഫലം.

൩൫൭. തിണദോസാനി ഖേത്താനി, ദോസദോസാ അയം പജാ;

തസ്മാ ഹി വീതദോസേസു, ദിന്നം ഹോതി മഹപ്ഫലം.

൩൫൮. തിണദോസാനി ഖേത്താനി, മോഹദോസാ അയം പജാ;

തസ്മാ ഹി വീതമോഹേസു, ദിന്നം ഹോതി മഹപ്ഫലം.

൩൫൯. (തിണദോസാനി ഖേത്താനി, ഇച്ഛാദോസാ അയം പജാ;

തസ്മാ ഹി വിഗതിച്ഛേസു, ദിന്നം ഹോതി മഹപ്ഫലം.) [( ) വിദേസപോത്ഥകേസു നത്ഥി, അട്ഠകഥായമ്പി ന ദിസ്സതി]

തിണദോസാനി ഖേത്താനി, തണ്ഹാദോസാ അയം പജാ;

തസ്മാ ഹി വീതതണ്ഹേസു, ദിന്നം ഹോതി മഹപ്ഫലം.

തണ്ഹാവഗ്ഗോ ചതുവീസതിമോ നിട്ഠിതോ.