൨൩. നാഗവഗ്ഗോ

൩൨൦. അഹം നാഗോവ സങ്ഗാമേ, ചാപതോ പതിതം സരം;

അതിവാക്യം തിതിക്ഖിസ്സം, ദുസ്സീലോ ഹി ബഹുജ്ജനോ.

൩൨൧. ദന്തം നയന്തി സമിതിം, ദന്തം രാജാഭിരൂഹതി;

ദന്തോ സേട്ഠോ മനുസ്സേസു, യോതിവാക്യം തിതിക്ഖതി.

൩൨൨. വരമസ്സതരാ ദന്താ, ആജാനീയാ ച [ആജാനീയാവ (സ്യാ.)] സിന്ധവാ;

കുഞ്ജരാ ച [കുഞ്ജരാവ (സ്യാ.)] മഹാനാഗാ, അത്തദന്തോ തതോ വരം.

൩൨൩. ന ഹി ഏതേഹി യാനേഹി, ഗച്ഛേയ്യ അഗതം ദിസം;

യഥാത്തനാ സുദന്തേന, ദന്തോ ദന്തേന ഗച്ഛതി.

൩൨൪. ധനപാലോ [ധനപാലകോ (സീ. സ്യാ. കം. പീ.)] നാമ കുഞ്ജരോ, കടുകഭേദനോ [കടുകപ്പഭേദനോ (സീ. സ്യാ. പീ.)] ദുന്നിവാരയോ;

ബദ്ധോ കബളം ന ഭുഞ്ജതി, സുമരതി [സുസരതി (ക.)] നാഗവനസ്സ കുഞ്ജരോ.

൩൨൫. മിദ്ധീ യദാ ഹോതി മഹഗ്ഘസോ ച, നിദ്ദായിതാ സമ്പരിവത്തസായീ;

മഹാവരാഹോവ നിവാപപുട്ഠോ, പുനപ്പുനം ഗബ്ഭമുപേതി മന്ദോ.

൩൨൬. ഇദം പുരേ ചിത്തമചാരി ചാരികം, യേനിച്ഛകം യത്ഥകാമം യഥാസുഖം;

തദജ്ജഹം നിഗ്ഗഹേസ്സാമി യോനിസോ, ഹത്ഥിപ്പഭിന്നം വിയ അങ്കുസഗ്ഗഹോ.

൩൨൭. അപ്പമാദരതാ ഹോഥ, സചിത്തമനുരക്ഖഥ;

ദുഗ്ഗാ ഉദ്ധരഥത്താനം, പങ്കേ സന്നോവ [സത്തോവ (സീ. പീ.)] കുഞ്ജരോ.

൩൨൮. സചേ ലഭേഥ നിപകം സഹായം, സദ്ധിം ചരം സാധുവിഹാരിധീരം;

അഭിഭുയ്യ സബ്ബാനി പരിസ്സയാനി, ചരേയ്യ തേനത്തമനോ സതീമാ.

൩൨൯. നോ ചേ ലഭേഥ നിപകം സഹായം, സദ്ധിം ചരം സാധുവിഹാരിധീരം;

രാജാവ രട്ഠം വിജിതം പഹായ, ഏകോ ചരേ മാതങ്ഗരഞ്ഞേവ നാഗോ.

൩൩൦. ഏകസ്സ ചരിതം സേയ്യോ, നത്ഥി ബാലേ സഹായതാ;

ഏകോ ചരേ ന ച പാപാനി കയിരാ, അപ്പോസ്സുക്കോ മാതങ്ഗരഞ്ഞേവ നാഗോ.

൩൩൧. അത്ഥമ്ഹി ജാതമ്ഹി സുഖാ സഹായാ, തുട്ഠീ സുഖാ യാ ഇതരീതരേന;

പുഞ്ഞം സുഖം ജീവിതസങ്ഖയമ്ഹി, സബ്ബസ്സ ദുക്ഖസ്സ സുഖം പഹാനം.

൩൩൨. സുഖാ മത്തേയ്യതാ ലോകേ, അഥോ പേത്തേയ്യതാ സുഖാ;

സുഖാ സാമഞ്ഞതാ ലോകേ, അഥോ ബ്രഹ്മഞ്ഞതാ സുഖാ.

൩൩൩. സുഖം യാവ ജരാ സീലം, സുഖാ സദ്ധാ പതിട്ഠിതാ;

സുഖോ പഞ്ഞായ പടിലാഭോ, പാപാനം അകരണം സുഖം.

നാഗവഗ്ഗോ തേവീസതിമോ നിട്ഠിതോ.