൨൦. മഗ്ഗവഗ്ഗോ

൨൭൩. മഗ്ഗാനട്ഠങ്ഗികോ സേട്ഠോ, സച്ചാനം ചതുരോ പദാ;

വിരാഗോ സേട്ഠോ ധമ്മാനം, ദ്വിപദാനഞ്ച ചക്ഖുമാ.

൨൭൪. ഏസേവ [ഏസോവ (സീ. പീ.)] മഗ്ഗോ നത്ഥഞ്ഞോ, ദസ്സനസ്സ വിസുദ്ധിയാ;

ഏതഞ്ഹി തുമ്ഹേ പടിപജ്ജഥ, മാരസ്സേതം പമോഹനം.

൨൭൫. ഏതഞ്ഹി തുമ്ഹേ പടിപന്നാ, ദുക്ഖസ്സന്തം കരിസ്സഥ;

അക്ഖാതോ വോ [അക്ഖാതോ വേ (സീ. പീ.)] മയാ മഗ്ഗോ, അഞ്ഞായ സല്ലകന്തനം [സല്ലസന്ഥനം (സീ. പീ.), സല്ലസത്ഥനം (സ്യാ.)].

൨൭൬. തുമ്ഹേഹി കിച്ചമാതപ്പം, അക്ഖാതാരോ തഥാഗതാ;

പടിപന്നാ പമോക്ഖന്തി, ഝായിനോ മാരബന്ധനാ.

൨൭൭. ‘‘സബ്ബേ സങ്ഖാരാ അനിച്ചാ’’തി, യദാ പഞ്ഞായ പസ്സതി;

അഥ നിബ്ബിന്ദതി ദുക്ഖേ, ഏസ മഗ്ഗോ വിസുദ്ധിയാ.

൨൭൮. ‘‘സബ്ബേ സങ്ഖാരാ ദുക്ഖാ’’തി, യദാ പഞ്ഞായ പസ്സതി;

അഥ നിബ്ബിന്ദതി ദുക്ഖേ, ഏസ മഗ്ഗോ വിസുദ്ധിയാ.

൨൭൯. ‘‘സബ്ബേ ധമ്മാ അനത്താ’’തി, യദാ പഞ്ഞായ പസ്സതി;

അഥ നിബ്ബിന്ദതി ദുക്ഖേ, ഏസ മഗ്ഗോ വിസുദ്ധിയാ.

൨൮൦. ഉട്ഠാനകാലമ്ഹി അനുട്ഠഹാനോ, യുവാ ബലീ ആലസിയം ഉപേതോ;

സംസന്നസങ്കപ്പമനോ [അസമ്പന്നസങ്കപ്പമനോ (ക.)] കുസീതോ, പഞ്ഞായ മഗ്ഗം അലസോ ന വിന്ദതി.

൨൮൧. വാചാനുരക്ഖീ മനസാ സുസംവുതോ, കായേന ച നാകുസലം കയിരാ [അകുസലം ന കയിരാ (സീ. സ്യാ. കം. പീ.)];

ഏതേ തയോ കമ്മപഥേ വിസോധയേ, ആരാധയേ മഗ്ഗമിസിപ്പവേദിതം.

൨൮൨. യോഗാ വേ ജായതീ [ജായതേ (കത്ഥചി)] ഭൂരി, അയോഗാ ഭൂരിസങ്ഖയോ;

ഏതം ദ്വേധാപഥം ഞത്വാ, ഭവായ വിഭവായ ച;

തഥാത്താനം നിവേസേയ്യ, യഥാ ഭൂരി പവഡ്ഢതി.

൨൮൩. വനം ഛിന്ദഥ മാ രുക്ഖം, വനതോ ജായതേ ഭയം;

ഛേത്വാ വനഞ്ച വനഥഞ്ച, നിബ്ബനാ ഹോഥ ഭിക്ഖവോ.

൨൮൪. യാവ ഹി വനഥോ ന ഛിജ്ജതി, അണുമത്തോപി നരസ്സ നാരിസു;

പടിബദ്ധമനോവ [പടിബന്ധമനോവ (ക.)] താവ സോ, വച്ഛോ ഖീരപകോവ [ഖീരപാനോവ (പീ.)] മാതരി.

൨൮൫. ഉച്ഛിന്ദ സിനേഹമത്തനോ കുമുദം സാരദികംവ [പാണിനാ];

സന്തിമഗ്ഗമേവ ബ്രൂഹയ, നിബ്ബാനം സുഗതേന ദേസിതം.

൨൮൬. ഇധ വസ്സം വസിസ്സാമി, ഇധ ഹേമന്തഗിമ്ഹിസു;

ഇതി ബാലോ വിചിന്തേതി, അന്തരായം ന ബുജ്ഝതി.

൨൮൭. തം പുത്തപസുസമ്മത്തം, ബ്യാസത്തമനസം നരം;

സുത്തം ഗാമം മഹോഘോവ, മച്ചു ആദായ ഗച്ഛതി.

൨൮൮. ന സന്തി പുത്താ താണായ, ന പിതാ നാപി ബന്ധവാ;

അന്തകേനാധിപന്നസ്സ, നത്ഥി ഞാതീസു താണതാ.

൨൮൯. ഏതമത്ഥവസം ഞത്വാ, പണ്ഡിതോ സീലസംവുതോ;

നിബ്ബാനഗമനം മഗ്ഗം, ഖിപ്പമേവ വിസോധയേ.

മഗ്ഗവഗ്ഗോ വീസതിമോ നിട്ഠിതോ.