൨൧. പകിണ്ണകവഗ്ഗോ

൨൯൦. മത്താസുഖപരിച്ചാഗാ, പസ്സേ ചേ വിപുലം സുഖം;

ചജേ മത്താസുഖം ധീരോ, സമ്പസ്സം വിപുലം സുഖം.

൨൯൧. പരദുക്ഖൂപധാനേന, അത്തനോ [യോ അത്തനോ (സ്യാ. പീ. ക.)] സുഖമിച്ഛതി;

വേരസംസഗ്ഗസംസട്ഠോ, വേരാ സോ ന പരിമുച്ചതി.

൨൯൨. യഞ്ഹി കിച്ചം അപവിദ്ധം [തദപവിദ്ധം (സീ. സ്യാ.)], അകിച്ചം പന കയിരതി;

ഉന്നളാനം പമത്താനം, തേസം വഡ്ഢന്തി ആസവാ.

൨൯൩. യേസഞ്ച സുസമാരദ്ധാ, നിച്ചം കായഗതാ സതി;

അകിച്ചം തേ ന സേവന്തി, കിച്ചേ സാതച്ചകാരിനോ;

സതാനം സമ്പജാനാനം, അത്ഥം ഗച്ഛന്തി ആസവാ.

൨൯൪. മാതരം പിതരം ഹന്ത്വാ, രാജാനോ ദ്വേ ച ഖത്തിയേ;

രട്ഠം സാനുചരം ഹന്ത്വാ, അനീഘോ യാതി ബ്രാഹ്മണോ.

൨൯൫. മാതരം പിതരം ഹന്ത്വാ, രാജാനോ ദ്വേ ച സോത്ഥിയേ;

വേയഗ്ഘപഞ്ചമം ഹന്ത്വാ, അനീഘോ യാതി ബ്രാഹ്മണോ.

൨൯൬. സുപ്പബുദ്ധം പബുജ്ഝന്തി, സദാ ഗോതമസാവകാ;

യേസം ദിവാ ച രത്തോ ച, നിച്ചം ബുദ്ധഗതാ സതി.

൨൯൭. സുപ്പബുദ്ധം പബുജ്ഝന്തി, സദാ ഗോതമസാവകാ;

യേസം ദിവാ ച രത്തോ ച, നിച്ചം ധമ്മഗതാ സതി.

൨൯൮. സുപ്പബുദ്ധം പബുജ്ഝന്തി, സദാ ഗോതമസാവകാ;

യേസം ദിവാ ച രത്തോ ച, നിച്ചം സങ്ഘഗതാ സതി.

൨൯൯. സുപ്പബുദ്ധം പബുജ്ഝന്തി, സദാ ഗോതമസാവകാ;

യേസം ദിവാ ച രത്തോ ച, നിച്ചം കായഗതാ സതി.

൩൦൦. സുപ്പബുദ്ധം പബുജ്ഝന്തി, സദാ ഗോതമസാവകാ;

യേസം ദിവാ ച രത്തോ ച, അഹിംസായ രതോ മനോ.

൩൦൧. സുപ്പബുദ്ധം പബുജ്ഝന്തി, സദാ ഗോതമസാവകാ;

യേസം ദിവാ ച രത്തോ ച, ഭാവനായ രതോ മനോ.

൩൦൨. ദുപ്പബ്ബജ്ജം ദുരഭിരമം, ദുരാവാസാ ഘരാ ദുഖാ;

ദുക്ഖോസമാനസംവാസോ, ദുക്ഖാനുപതിതദ്ധഗൂ;

തസ്മാ ന ചദ്ധഗൂ സിയാ, ന ച [തസ്മാ ന ചദ്ധഗൂ ന ച (ക.)] ദുക്ഖാനുപതിതോ സിയാ [ദുക്ഖാനുപാതിതോ (?)].

൩൦൩. സദ്ധോ സീലേന സമ്പന്നോ, യസോഭോഗസമപ്പിതോ;

യം യം പദേസം ഭജതി, തത്ഥ തത്ഥേവ പൂജിതോ.

൩൦൪. ദൂരേ സന്തോ പകാസേന്തി, ഹിമവന്തോവ പബ്ബതോ;

അസന്തേത്ഥ ന ദിസ്സന്തി, രത്തിം ഖിത്താ യഥാ സരാ.

൩൦൫. ഏകാസനം ഏകസേയ്യം, ഏകോ ചരമതന്ദിതോ;

ഏകോ ദമയമത്താനം, വനന്തേ രമിതോ സിയാ.

പകിണ്ണകവഗ്ഗോ ഏകവീസതിമോ നിട്ഠിതോ.