൧൯. ധമ്മട്ഠവഗ്ഗോ

൨൫൬. ന തേന ഹോതി ധമ്മട്ഠോ, യേനത്ഥം സാഹസാ [സഹസാ (സീ. സ്യാ. ക.)] നയേ;

യോ ച അത്ഥം അനത്ഥഞ്ച, ഉഭോ നിച്ഛേയ്യ പണ്ഡിതോ.

൨൫൭. അസാഹസേന ധമ്മേന, സമേന നയതീ പരേ;

ധമ്മസ്സ ഗുത്തോ മേധാവീ, ‘‘ധമ്മട്ഠോ’’തി പവുച്ചതി.

൨൫൮. ന തേന പണ്ഡിതോ ഹോതി, യാവതാ ബഹു ഭാസതി;

ഖേമീ അവേരീ അഭയോ, ‘‘പണ്ഡിതോ’’തി പവുച്ചതി.

൨൫൯. ന താവതാ ധമ്മധരോ, യാവതാ ബഹു ഭാസതി;

യോ ച അപ്പമ്പി സുത്വാന, ധമ്മം കായേന പസ്സതി;

സ വേ ധമ്മധരോ ഹോതി, യോ ധമ്മം നപ്പമജ്ജതി.

൨൬൦. ന തേന ഥേരോ സോ ഹോതി [ഥേരോ ഹോതി (സീ. സ്യാ.)], യേനസ്സ പലിതം സിരോ;

പരിപക്കോ വയോ തസ്സ, ‘‘മോഘജിണ്ണോ’’തി വുച്ചതി.

൨൬൧. യമ്ഹി സച്ചഞ്ച ധമ്മോ ച, അഹിംസാ സംയമോ ദമോ;

സ വേ വന്തമലോ ധീരോ, ‘‘ഥേരോ’’ ഇതി [സോ ഥേരോതി (സ്യാ. ക.)] പവുച്ചതി.

൨൬൨. ന വാക്കരണമത്തേന, വണ്ണപോക്ഖരതായ വാ;

സാധുരൂപോ നരോ ഹോതി, ഇസ്സുകീ മച്ഛരീ സഠോ.

൨൬൩. യസ്സ ചേതം സമുച്ഛിന്നം, മൂലഘച്ചം സമൂഹതം;

സ വന്തദോസോ മേധാവീ, ‘‘സാധുരൂപോ’’തി വുച്ചതി.

൨൬൪. ന മുണ്ഡകേന സമണോ, അബ്ബതോ അലികം ഭണം;

ഇച്ഛാലോഭസമാപന്നോ, സമണോ കിം ഭവിസ്സതി.

൨൬൫. യോ ച സമേതി പാപാനി, അണും ഥൂലാനി സബ്ബസോ;

സമിതത്താ ഹി പാപാനം, ‘‘സമണോ’’തി പവുച്ചതി.

൨൬൬. ന തേന ഭിക്ഖു സോ ഹോതി, യാവതാ ഭിക്ഖതേ പരേ;

വിസ്സം ധമ്മം സമാദായ, ഭിക്ഖു ഹോതി ന താവതാ.

൨൬൭. യോധ പുഞ്ഞഞ്ച പാപഞ്ച, ബാഹേത്വാ ബ്രഹ്മചരിയവാ [ബ്രഹ്മചരിയം (ക.)];

സങ്ഖായ ലോകേ ചരതി, സ വേ ‘‘ഭിക്ഖൂ’’തി വുച്ചതി.

൨൬൮. ന മോനേന മുനീ ഹോതി, മൂള്ഹരൂപോ അവിദ്ദസു;

യോ ച തുലംവ പഗ്ഗയ്ഹ, വരമാദായ പണ്ഡിതോ.

൨൬൯. പാപാനി പരിവജ്ജേതി, സ മുനീ തേന സോ മുനി;

യോ മുനാതി ഉഭോ ലോകേ, ‘‘മുനി’’ തേന പവുച്ചതി.

൨൭൦. ന തേന അരിയോ ഹോതി, യേന പാണാനി ഹിംസതി;

അഹിംസാ സബ്ബപാണാനം, ‘‘അരിയോ’’തി പവുച്ചതി.

൨൭൧. ന സീലബ്ബതമത്തേന, ബാഹുസച്ചേന വാ പന;

അഥ വാ സമാധിലാഭേന, വിവിത്തസയനേന വാ.

൨൭൨. ഫുസാമി നേക്ഖമ്മസുഖം, അപുഥുജ്ജനസേവിതം;

ഭിക്ഖു വിസ്സാസമാപാദി, അപ്പത്തോ ആസവക്ഖയം.

ധമ്മട്ഠവഗ്ഗോ ഏകൂനവീസതിമോ നിട്ഠിതോ.