൧൮. മലവഗ്ഗോ

൨൩൫. പണ്ഡുപലാസോവ ദാനിസി, യമപുരിസാപി ച തേ [തം (സീ. സ്യാ. കം. പീ.)] ഉപട്ഠിതാ;

ഉയ്യോഗമുഖേ ച തിട്ഠസി, പാഥേയ്യമ്പി ച തേ ന വിജ്ജതി.

൨൩൬. സോ കരോഹി ദീപമത്തനോ, ഖിപ്പം വായമ പണ്ഡിതോ ഭവ;

നിദ്ധന്തമലോ അനങ്ഗണോ, ദിബ്ബം അരിയഭൂമിം ഉപേഹിസി [ദിബ്ബം അരിയഭൂമിമേഹിസി (സീ. സ്യാ. പീ.), ദിബ്ബമരിയഭൂമിം ഉപേഹിസി (?)].

൨൩൭. ഉപനീതവയോ ച ദാനിസി, സമ്പയാതോസി യമസ്സ സന്തികേ;

വാസോ [വാസോപി ച (ബഹൂസു)] തേ നത്ഥി അന്തരാ, പാഥേയ്യമ്പി ച തേ ന വിജ്ജതി.

൨൩൮. സോ കരോഹി ദീപമത്തനോ, ഖിപ്പം വായമ പണ്ഡിതോ ഭവ;

നിദ്ധന്തമലോ അനങ്ഗണോ, ന പുനം ജാതിജരം [ന പുന ജാതിജരം (സീ. സ്യാ.), ന പുന ജാതിജ്ജരം (ക.)] ഉപേഹിസി.

൨൩൯. അനുപുബ്ബേന മേധാവീ, ഥോകം ഥോകം ഖണേ ഖണേ;

കമ്മാരോ രജതസ്സേവ, നിദ്ധമേ മലമത്തനോ.

൨൪൦. അയസാവ മലം സമുട്ഠിതം [സമുട്ഠായ (ക.)], തതുട്ഠായ [തദുട്ഠായ (സീ. സ്യാ. പീ.)] തമേവ ഖാദതി;

ഏവം അതിധോനചാരിനം, സാനി കമ്മാനി [സകകമ്മാനി (സീ. പീ.)] നയന്തി ദുഗ്ഗതിം.

൨൪൧. അസജ്ഝായമലാ മന്താ, അനുട്ഠാനമലാ ഘരാ;

മലം വണ്ണസ്സ കോസജ്ജം, പമാദോ രക്ഖതോ മലം.

൨൪൨. മലിത്ഥിയാ ദുച്ചരിതം, മച്ഛേരം ദദതോ മലം;

മലാ വേ പാപകാ ധമ്മാ, അസ്മിം ലോകേ പരമ്ഹി ച.

൨൪൩. തതോ മലാ മലതരം, അവിജ്ജാ പരമം മലം;

ഏതം മലം പഹന്ത്വാന, നിമ്മലാ ഹോഥ ഭിക്ഖവോ.

൨൪൪. സുജീവം അഹിരികേന, കാകസൂരേന ധംസിനാ;

പക്ഖന്ദിനാ പഗബ്ഭേന, സംകിലിട്ഠേന ജീവിതം.

൨൪൫. ഹിരീമതാ ച ദുജ്ജീവം, നിച്ചം സുചിഗവേസിനാ;

അലീനേനാപ്പഗബ്ഭേന, സുദ്ധാജീവേന പസ്സതാ.

൨൪൬. യോ പാണമതിപാതേതി, മുസാവാദഞ്ച ഭാസതി;

ലോകേ അദിന്നമാദിയതി, പരദാരഞ്ച ഗച്ഛതി.

൨൪൭. സുരാമേരയപാനഞ്ച, യോ നരോ അനുയുഞ്ജതി;

ഇധേവമേസോ ലോകസ്മിം, മൂലം ഖണതി അത്തനോ.

൨൪൮. ഏവം ഭോ പുരിസ ജാനാഹി, പാപധമ്മാ അസഞ്ഞതാ;

മാ തം ലോഭോ അധമ്മോ ച, ചിരം ദുക്ഖായ രന്ധയും.

൨൪൯. ദദാതി വേ യഥാസദ്ധം, യഥാപസാദനം [യത്ഥ പസാദനം (കത്ഥചി)] ജനോ;

തത്ഥ യോ മങ്കു ഭവതി [തത്ഥ ചേ മംകു യോ ഹോതി (സീ.), തത്ഥ യോ മങ്കുതോ ഹോതി (സ്യാ.)], പരേസം പാനഭോജനേ;

ന സോ ദിവാ വാ രത്തിം വാ, സമാധിമധിഗച്ഛതി.

൨൫൦. യസ്സ ചേതം സമുച്ഛിന്നം, മൂലഘച്ചം [മൂലഘച്ഛം (ക.)] സമൂഹതം;

സ വേ ദിവാ വാ രത്തിം വാ, സമാധിമധിഗച്ഛതി.

൨൫൧. നത്ഥി രാഗസമോ അഗ്ഗി, നത്ഥി ദോസസമോ ഗഹോ;

നത്ഥി മോഹസമം ജാലം, നത്ഥി തണ്ഹാസമാ നദീ.

൨൫൨. സുദസ്സം വജ്ജമഞ്ഞേസം, അത്തനോ പന ദുദ്ദസം;

പരേസം ഹി സോ വജ്ജാനി, ഓപുനാതി [ഓഫുനാതി (ക.)] യഥാ ഭുസം;

അത്തനോ പന ഛാദേതി, കലിംവ കിതവാ സഠോ.

൨൫൩. പരവജ്ജാനുപസ്സിസ്സ, നിച്ചം ഉജ്ഝാനസഞ്ഞിനോ;

ആസവാ തസ്സ വഡ്ഢന്തി, ആരാ സോ ആസവക്ഖയാ.

൨൫൪. ആകാസേവ പദം നത്ഥി, സമണോ നത്ഥി ബാഹിരേ;

പപഞ്ചാഭിരതാ പജാ, നിപ്പപഞ്ചാ തഥാഗതാ.

൨൫൫. ആകാസേവ പദം നത്ഥി, സമണോ നത്ഥി ബാഹിരേ;

സങ്ഖാരാ സസ്സതാ നത്ഥി, നത്ഥി ബുദ്ധാനമിഞ്ജിതം.

മലവഗ്ഗോ അട്ഠാരസമോ നിട്ഠിതോ.