൯. വട്ടപോതകചരിയാ

൭൨. ‘‘പുനാപരം യദാ ഹോമി, മഗധേ വട്ടപോതകോ;

അജാതപക്ഖോ തരുണോ, മംസപേസി കുലാവകേ.

൭൩. ‘‘മുഖതുണ്ഡകേനാഹരിത്വാ [മുഖതുണ്ഡേനാഹരിത്വാ (സീ.)], മാതാ പോസയതീ മമം;

തസ്സാ ഫസ്സേന ജീവാമി, നത്ഥി മേ കായികം ബലം.

൭൪. ‘‘സംവച്ഛരേ ഗിമ്ഹസമയേ, ദവഡാഹോ [വനദാഹോ (ക.)] പദിപ്പതി;

ഉപഗച്ഛതി അമ്ഹാകം, പാവകോ കണ്ഹവത്തനീ.

൭൫. ‘‘ധമധമാ ഇതിഏവം, സദ്ദായന്തോ മഹാസിഖീ;

അനുപുബ്ബേന ഝാപേന്തോ, അഗ്ഗി മമമുപാഗമി.

൭൬. ‘‘അഗ്ഗിവേഗഭയാതീതാ, തസിതാ മാതാപിതാ മമ;

കുലാവകേ മം ഛഡ്ഡേത്വാ, അത്താനം പരിമോചയും.

൭൭. ‘‘പാദേ പക്ഖേ പജഹാമി, നത്ഥി മേ കായികം ബലം;

സോഹം അഗതികോ തത്ഥ, ഏവം ചിന്തേസഹം തദാ.

൭൮. ‘‘‘യേസാഹം ഉപധാവേയ്യം, ഭീതോ തസിതവേധിതോ;

തേ മം ഓഹായ പക്കന്താ, കഥം മേ അജ്ജ കാതവേ.

൭൯. ‘‘‘അത്ഥി ലോകേ സീലഗുണോ, സച്ചം സോചേയ്യനുദ്ദയാ;

തേന സച്ചേന കാഹാമി, സച്ചകിരിയമുത്തമം.

൮൦. ‘‘‘ആവേജ്ജേത്വാ ധമ്മബലം, സരിത്വാ പുബ്ബകേ ജിനേ;

സച്ചബലമവസ്സായ, സച്ചകിരിയമകാസഹം.

൮൧. ‘‘‘സന്തി പക്ഖാ അപതനാ, സന്തി പാദാ അവഞ്ചനാ;

മാതാപിതാ ച നിക്ഖന്താ, ജാതവേദ പടിക്കമ’.

൮൨. ‘‘സഹസച്ചേ കതേ മയ്ഹം, മഹാപജ്ജലിതോ സിഖീ;

വജ്ജേസി സോളസകരീസാനി, ഉദകം പത്വാ യഥാ സിഖീ;

സച്ചേന മേ സമോ നത്ഥി, ഏസാ മേ സച്ചപാരമീ’’തി.

വട്ടപോതകചരിയം നവമം.