൧൨. സുതസോമചരിയാ

൧൦൫. ‘‘പുനാപരം യദാ ഹോമി, സുതസോമോ മഹീപതി;

ഗഹിതോ പോരിസാദേന, ബ്രാഹ്മണേ സങ്ഗരം സരിം.

൧൦൬. ‘‘ഖത്തിയാനം ഏകസതം, ആവുണിത്വാ കരത്തലേ;

ഏതേസം പമിലാപേത്വാ, യഞ്ഞത്ഥേ ഉപനയീ മമം.

൧൦൭. ‘‘അപുച്ഛി മം പോരിസാദോ, ‘കിം ത്വം ഇച്ഛസി നിസ്സജം;

യഥാമതി തേ കാഹാമി, യദി മേ ത്വം പുനേഹിസി’.

൧൦൮. ‘‘തസ്സ പടിസ്സുണിത്വാന, പണ്ഹേ ആഗമനം മമ;

ഉപഗന്ത്വാ പുരം രമ്മം, രജ്ജം നിയ്യാദയിം തദാ.

൧൦൯. ‘‘അനുസ്സരിത്വാ സതം ധമ്മം, പുബ്ബകം ജിനസേവിതം;

ബ്രാഹ്മണസ്സ ധനം ദത്വാ, പോരിസാദം ഉപാഗമിം.

൧൧൦. ‘‘നത്ഥി മേ സംസയോ തത്ഥ, ഘാതയിസ്സതി വാ ന വാ;

സച്ചവാചാനുരക്ഖന്തോ, ജീവിതം ചജിതുമുപാഗമിം;

സച്ചേന മേ സമോ നത്ഥി, ഏസാ മേ സച്ചപാരമീ’’തി.

സുതസോമചരിയം ദ്വാദസമം.