൬. രുരുരാജചരിയാ

൪൮. ‘‘പുനാപരം യദാ ഹോമി, സുതത്തകനകസന്നിഭോ;

മിഗരാജാ രുരുനാമ, പരമസീലസമാഹിതോ.

൪൯. ‘‘രമ്മേ പദേസേ രമണീയേ, വിവിത്തേ അമനുസ്സകേ;

തത്ഥ വാസം ഉപഗഞ്ഛിം, ഗങ്ഗാകൂലേ മനോരമേ.

൫൦. ‘‘അഥ ഉപരി ഗങ്ഗായ, ധനികേഹി പരിപീളിതോ;

പുരിസോ ഗങ്ഗായ പപതി, ‘ജീവാമി വാ മരാമി വാ’.

൫൧. ‘‘രത്തിന്ദിവം സോ ഗങ്ഗായ, വുയ്ഹമാനോ മഹോദകേ;

രവന്തോ കരുണം രവം, മജ്ഝേ ഗങ്ഗായ ഗച്ഛതി.

൫൨. ‘‘തസ്സാഹം സദ്ദം സുത്വാന, കരുണം പരിദേവതോ;

ഗങ്ഗായ തീരേ ഠത്വാന, അപുച്ഛിം ‘കോസി ത്വം നരോ’.

൫൩. ‘‘സോ മേ പുട്ഠോ ച ബ്യാകാസി, അത്തനോ കരണം തദാ;

‘ധനികേഹി ഭീതോ തസിതോ, പക്ഖന്ദോഹം മഹാനദിം’.

൫൪. ‘‘തസ്സ കത്വാന കാരുഞ്ഞം, ചജിത്വാ മമ ജീവിതം;

പവിസിത്വാ നീഹരിം തസ്സ, അന്ധകാരമ്ഹി രത്തിയാ.

൫൫. ‘‘അസ്സത്ഥകാലമഞ്ഞായ, തസ്സാഹം ഇദമബ്രവിം;

‘ഏകം തം വരം യാചാമി, മാ മം കസ്സചി പാവദ’.

൫൬. ‘‘നഗരം ഗന്ത്വാന ആചിക്ഖി, പുച്ഛിതോ ധനഹേതുകോ;

രാജാനം സോ ഗഹേത്വാന, ഉപഗഞ്ഛി മമന്തികം.

൫൭. ‘‘യാവതാ കരണം സബ്ബം, രഞ്ഞോ ആരോചിതം മയാ;

രാജാ സുത്വാന വചനം, ഉസും തസ്സ പകപ്പയി;

‘ഇധേവ ഘാതയിസ്സാമി, മിത്തദുബ്ഭിം [മിത്തദൂഭിം (സീ.)] അനാരിയം’.

൫൮. ‘‘തമഹം അനുരക്ഖന്തോ, നിമ്മിനിം മമ അത്തനാ;

‘തിട്ഠതേസോ മഹാരാജ, കാമകാരോ ഭവാമി തേ’.

൫൯. ‘‘അനുരക്ഖിം മമ സീലം, നാരക്ഖിം മമ ജീവിതം;

സീലവാ ഹി തദാ ആസിം, ബോധിയായേവ കാരണാ’’തി.

രുരുരാജചരിയം ഛട്ഠം.