൨. ഭൂരിദത്തചരിയാ

൧൧. ‘‘പുനാപരം യദാ ഹോമി, ഭൂരിദത്തോ മഹിദ്ധികോ;

വിരൂപക്ഖേന മഹാരഞ്ഞാ, ദേവലോകമഗഞ്ഛഹം.

൧൨. ‘‘തത്ഥ പസ്സിത്വാഹം ദേവേ, ഏകന്തം സുഖസമപ്പിതേ;

തം സഗ്ഗഗമനത്ഥായ, സീലബ്ബതം സമാദിയിം.

൧൩. ‘‘സരീരകിച്ചം കത്വാന, ഭുത്വാ യാപനമത്തകം;

ചതുരോ അങ്ഗേ അധിട്ഠായ, സേമി വമ്മികമുദ്ധനി.

൧൪. ‘‘ഛവിയാ ചമ്മേന മംസേന, നഹാരുഅട്ഠികേഹി വാ;

യസ്സ ഏതേന കരണീയം, ദിന്നംയേവ ഹരാതു സോ.

൧൫. ‘‘സംസിതോ അകതഞ്ഞുനാ, ആലമ്പായനോ [ആലമ്ബണോ (സീ.)] മമഗ്ഗഹി;

പേളായ പക്ഖിപിത്വാന, കീളേതി മം തഹിം തഹിം.

൧൬. ‘‘പേളായ പക്ഖിപന്തേപി, സമ്മദ്ദന്തേപി പാണിനാ;

ആലമ്പായനേ [ആലമ്ബണേ (സീ.)] ന കുപ്പാമി, സീലഖണ്ഡഭയാ മമ.

൧൭. ‘‘സകജീവിതപരിച്ചാഗോ, തിണതോ ലഹുകോ മമ;

സീലവീതിക്കമോ മയ്ഹം, പഥവീഉപ്പതനം വിയ.

൧൮. ‘‘നിരന്തരം ജാതിസതം, ചജേയ്യം മമ ജീവിതം;

നേവ സീലം പഭിന്ദേയ്യം, ചതുദ്ദീപാന ഹേതുപി.

൧൯. ‘‘അപി ചാഹം സീലരക്ഖായ, സീലപാരമിപൂരിയാ;

ന കരോമി ചിത്തേ അഞ്ഞഥത്തം, പക്ഖിപന്തമ്പി പേളകേ’’തി.

ഭൂരിദത്തചരിയം ദുതിയം.