൩. നിപന്നഞ്ജലികത്ഥേരഅപദാനം

൧൬. ‘‘രുക്ഖമൂലേ നിസിന്നോഹം, ബ്യാധിതോ പരമേന ച;

പരമകാരുഞ്ഞപത്തോമ്ഹി, അരഞ്ഞേ കാനനേ അഹം.

൧൭. ‘‘അനുകമ്പം ഉപാദായ, തിസ്സോ സത്ഥാ ഉപേസി മം;

സോഹം നിപന്നകോ സന്തോ, സിരേ കത്വാന അഞ്ജലിം.

൧൮. ‘‘പസന്നചിത്തോ സുമനോ, സബ്ബസത്താനമുത്തമം;

സമ്ബുദ്ധം അഭിവാദേത്വാ, തത്ഥ കാലങ്കതോ അഹം.

൧൯. ‘‘ദ്വേനവുതേ ഇതോ കപ്പേ, യം വന്ദിം പുരിസുത്തമം;

ദുഗ്ഗതിം നാഭിജാനാമി, വന്ദനായ ഇദം ഫലം.

൨൦. ‘‘ഇതോ പഞ്ചമകേ കപ്പേ, പഞ്ചേവാസും മഹാസിഖാ;

സത്തരതനസമ്പന്നാ, ചക്കവത്തീ മഹബ്ബലാ.

൨൧. ‘‘പടിസമ്ഭിദാ ചതസ്സോ…പേ… കതം ബുദ്ധസ്സ സാസനം’’.

ഇത്ഥം സുദം ആയസ്മാ നിപന്നഞ്ജലികോ ഥേരോ ഇമാ ഗാഥായോ അഭാസിത്ഥാതി.

നിപന്നഞ്ജലികത്ഥേരസ്സാപദാനം തതിയം.