൬. തിണസന്ഥരദായകത്ഥേരഅപദാനം

൨൨. ‘‘ഹിമവന്തസ്സാവിദൂരേ, മഹാജാതസ്സരോ അഹു;

സതപത്തേഹി സഞ്ഛന്നോ, നാനാസകുണമാലയോ.

൨൩. ‘‘തമ്ഹി ന്ഹത്വാ ച പിത്വാ [പീത്വാ (സീ. സ്യാ.)] ച, അവിദൂരേ വസാമഹം;

അദ്ദസം സമണാനഗ്ഗം, ഗച്ഛന്തം അനിലഞ്ജസേ.

൨൪. ‘‘മമ സങ്കപ്പമഞ്ഞായ, സത്ഥാ ലോകേ അനുത്തരോ;

അബ്ഭതോ ഓരുഹിത്വാന, ഭൂമിയംഠാസി താവദേ.

൨൫. ‘‘വിസാണേന [ലായനേന (സ്യാ.)] തിണം ഗയ്ഹ, നിസീദനമദാസഹം;

നിസീദി ഭഗവാ തത്ഥ, തിസ്സോ ലോകഗ്ഗനായകോ.

൨൬. ‘‘സകം ചിത്തം പസാദേത്വാ, അവന്ദി ലോകനായകം;

പടികുടികോ [ഉക്കുടികോ (സ്യാ. ക.)] അപസക്കിം, നിജ്ഝായന്തോ മഹാമുനിം.

൨൭. ‘‘തേന ചിത്തപ്പസാദേന, നിമ്മാനം ഉപപജ്ജഹം;

ദുഗ്ഗതിം നാഭിജാനാമി, സന്ഥരസ്സ ഇദം ഫലം.

൨൮. ‘‘ഇതോ ദുതിയകേ കപ്പേ, മിഗ [മിത്ത (സ്യാ.)] സമ്മതഖത്തിയോ;

സത്തരതനസമ്പന്നോ, ചക്കവത്തീ മഹബ്ബലോ.

൨൯. ‘‘പടിസമ്ഭിദാ ചതസ്സോ…പേ… കതം ബുദ്ധസ്സ സാസനം’’.

ഇത്ഥം സുദം ആയസ്മാ തിണസന്ഥരദായകോ ഥേരോ ഇമാ ഗാഥായോ അഭാസിത്ഥാതി.

തിണസന്ഥരദായകത്ഥേരസ്സാപദാനം ഛട്ഠം.