൧. സകചിന്തനിയത്ഥേരഅപദാനം

൧. ‘‘പവനം കാനനം ദിസ്വാ, അപ്പസദ്ദമന്നാവിലം;

ഇസീനം അനുചിണ്ണംവ, ആഹുതീനം പടിഗ്ഗഹം.

൨. ‘‘ഥൂപം കത്വാന പുലിനം [വേളുനാ (അട്ഠ.), വേളിനം (സ്യാ.)], നാനാപുപ്ഫം സമോകിരിം;

സമ്മുഖാ വിയ സമ്ബുദ്ധം, നിമ്മിതം അഭിവന്ദഹം.

൩. ‘‘സത്തരതനസമ്പന്നോ, രാജാ രട്ഠമ്ഹി ഇസ്സരോ;

സകകമ്മാഭിരദ്ധോഹം, പുപ്ഫപൂജായിദം [ഥൂപപൂജായിദം (സീ.)] ഫലം.

൪. ‘‘ഏകനവുതിതോ കപ്പേ, യം പുപ്ഫമഭിരോപയിം;

ദുഗ്ഗതിം നാഭിജാനാമി, പുപ്ഫപൂജായിദം [ഥൂപപൂജായിദം (സീ.)] ഫലം.

൫. ‘‘അസീതികപ്പേനന്തയസോ, ചക്കവത്തീ അഹോസഹം;

സത്തരതനസമ്പന്നോ, ചതുദീപമ്ഹി ഇസ്സരോ.

൬. ‘‘പടിസമ്ഭിദാ ചതസ്സോ, വിമോക്ഖാപി ച അട്ഠിമേ;

ഛളഭിഞ്ഞാ സച്ഛികതാ, കതം ബുദ്ധസ്സ സാസനം’’.

ഇത്ഥം സുദം ആയസ്മാ സകചിന്തനിയോ ഥേരോ ഇമാ ഗാഥായോ അഭാസിത്ഥാതി.

സകചിന്തനിയത്ഥേരസ്സാപദാനം പഠമം.