൫. ഓപവയ്ഹത്ഥേരഅപദാനം

൩൩. ‘‘പദുമുത്തരബുദ്ധസ്സ, ആജാനീയമദാസഹം;

നിയ്യാദേത്വാന സമ്ബുദ്ധേ [സമ്ബുദ്ധം (സീ. ക.)], അഗമാസിം സകം ഘരം.

൩൪. ‘‘ദേവലോ നാമ നാമേന, സത്ഥുനോ അഗ്ഗസാവകോ;

വരധമ്മസ്സ ദായാദോ, ആഗച്ഛി മമ സന്തികം.

൩൫. ‘‘സപത്തഭാരോ ഭഗവാ, ആജാനേയ്യോ ന കപ്പതി;

തവ സങ്കപ്പമഞ്ഞായ, അധിവാസേസി ചക്ഖുമാ.

൩൬. ‘‘അഗ്ഘാപേത്വാ വാതജവം, സിന്ധവം സീഘവാഹനം;

പദുമുത്തരബുദ്ധസ്സ, ഖമനീയമദാസഹം.

൩൭. ‘‘യം യം യോനുപപജ്ജാമി, ദേവത്തം അഥ മാനുസം [ദേവേ ച മാനുസേ ഭവേ (സീ. ക.)];

ഖമനീയം വാതജവം, ചിത്തം നിബ്ബത്തതേ [ആജാനീയാ വാതജവാ, വിത്തി നിബ്ബത്തരേ (സ്യാ.), ഖമനീയാ വാതജവാ, ചിത്താ നിബ്ബത്തരേ (സീ.)] മമ.

൩൮. ‘‘ലാഭം തേസം സുലദ്ധംവ, യേ ലഭന്തുപസമ്പദം;

പുനപി പയിരുപാസേയ്യം, ബുദ്ധോ ലോകേ സചേ ഭവേ.

൩൯. ‘‘അട്ഠവീസതിക്ഖത്തുംഹം, രാജാ ആസിം മഹബ്ബലോ;

ചാതുരന്തോ വിജിതാവീ, ജമ്ബുസണ്ഡസ്സ [ജമ്ബുദീപസ്സ (സ്യാ.), ജമ്ബുമണ്ഡസ്സ (ക.)] ജമ്ബുഇസ്സരോ.

൪൦. ‘‘ഇദം പച്ഛിമകം മയ്ഹം, ചരിമോ വത്തതേ ഭവോ;

പത്തോസ്മി അചലം ഠാനം, ഹിത്വാ ജയപരാജയം.

൪൧. ‘‘ചതുതിംസസഹസ്സമ്ഹി, മഹാതേജോസി ഖത്തിയോ;

സതരതനസമ്പന്നോ, ചക്കവത്തീ മഹബ്ബലോ.

൪൨. ‘‘പടിസമ്ഭിദാ ചതസ്സോ…പേ… കതം ബുദ്ധസ്സ സാസനം’’.

ഇത്ഥം സുദം ആയസ്മാ ഓപവയ്ഹോ ഥേരോ ഇമാ ഗാഥായോ അഭാസിത്ഥാതി.

ഓപവയ്ഹത്ഥേരസ്സാപദാനം പഞ്ചമം.