൨. സതരംസിത്ഥേരഅപദാനം

൮. ‘‘ഉബ്ബിദ്ധം സേലമാരുയ്ഹ, നിസീദി പുരിസുത്തമോ;

പബ്ബതസ്സാവിദൂരമ്ഹി, ബ്രാഹ്മണോ മന്തപാരഗൂ.

൯. ‘‘ഉപവിട്ഠം മഹാവീരം, ദേവദേവം നരാസഭം;

അഞ്ജലിം പഗ്ഗഹേത്വാന, സന്ഥവിം ലോകനായകം.

൧൦. ‘‘‘ഏസ ബുദ്ധോ മഹാവീരോ, വരധമ്മപ്പകാസകോ;

ജലതി അഗ്ഗിഖന്ധോവ, ഭിക്ഖുസങ്ഘപുരക്ഖതോ.

൧൧. ‘‘‘മഹാസമുദ്ദോവ‘ക്ഖുബ്ഭോ [’ക്ഖോഭോ (സീ. സ്യാ.)], അണ്ണവോവ ദുരുത്തരോ;

മിഗരാജാവസമ്ഭീതോ [ഛമ്ഭിതോ (ക.)], ധമ്മം ദേസേതി ചക്ഖുമാ’.

൧൨. ‘‘മമ സങ്കപ്പമഞ്ഞായ, പദുമുത്തരനായകോ;

ഭിക്ഖുസങ്ഘേ ഠിതോ സത്ഥാ, ഇമാ ഗാഥാ അഭാസഥ.

൧൩. ‘‘‘യേനായം [യേനാഹം (ക.)] അഞ്ജലീ ദിന്നോ, ബുദ്ധസേട്ഠോ ച ഥോമിതോ;

തിംസകപ്പസഹസ്സാനി, ദേവരജ്ജം കരിസ്സതി.

൧൪. ‘‘‘കപ്പസതസഹസ്സമ്ഹി, അങ്ഗീരസസനാമകോ;

വിവട്ടച്ഛദോ [വിവത്ഥച്ഛദ്ദോ (സീ.)] സമ്ബുദ്ധോ, ഉപ്പജ്ജിസ്സതി താവദേ.

൧൫. ‘‘‘തസ്സ ധമ്മേസു ദായാദോ, ഓരസോ ധമ്മനിമ്മിതോ;

സതരംസീതി നാമേന, അരഹാ സോ ഭവിസ്സതി’.

൧൬. ‘‘ജാതിയാ സത്തവസ്സോഹം, പബ്ബജിം അനഗാരിയം;

സതരംസിമ്ഹി നാമേന, പഭാ നിദ്ധാവതേ മമ.

൧൭. ‘‘മണ്ഡപേ രുക്ഖമൂലേ വാ, ഝായീ ഝാനരതോ അഹം;

ധാരേമി അന്തിമം ദേഹം, സമ്മാസമ്ബുദ്ധസാസനേ.

൧൮. ‘‘സട്ഠികപ്പസഹസ്സമ്ഹി, ചതുരോ രാമനാമകാ;

സത്തരതനസമ്പന്നാ, ചക്കവത്തീ മഹബ്ബലാ.

൧൯. ‘‘പടിസമ്ഭിദാ ചതസ്സോ…പേ… കതം ബുദ്ധസ്സ സാസനം’’.

ഇത്ഥം സുദം ആയസ്മാ സതരംസി ഥേരോ ഇമാ ഗാഥായോ അഭാസിത്ഥാതി.

സതരംസിത്ഥേരസ്സാപദാനം ദുതിയം.