൭. മഹാകോട്ഠികത്ഥേരഅപദാനം

൨൨൧. ‘‘പദുമുത്തരോ നാമ ജിനോ, സബ്ബലോകവിദൂ മുനി;

ഇതോ സതസഹസ്സമ്ഹി, കപ്പേ ഉപ്പജ്ജി ചക്ഖുമാ.

൨൨൨. ‘‘ഓവാദകോ വിഞ്ഞാപകോ, താരകോ സബ്ബപാണിനം;

ദേസനാകുസലോ ബുദ്ധോ, താരേസി ജനതം ബഹും.

൨൨൩. ‘‘അനുകമ്പകോ കാരുണികോ, ഹിതേസീ സബ്ബപാണിനം;

സമ്പത്തേ തിത്ഥിയേ സബ്ബേ, പഞ്ചസീലേ പതിട്ഠപി.

൨൨൪. ‘‘ഏവം നിരാകുലം ആസി, സുഞ്ഞതം തിത്ഥിയേഹി ച;

വിചിത്തം അരഹന്തേഹി, വസീഭൂതേഹി താദിഭി.

൨൨൫. ‘‘രതനാനട്ഠപഞ്ഞാസം, ഉഗ്ഗതോ സോ മഹാമുനി;

കഞ്ചനഗ്ഘിയസങ്കാസോ, ബാത്തിംസവരലക്ഖണോ.

൨൨൬. ‘‘വസ്സസതസഹസ്സാനി, ആയു വിജ്ജതി താവദേ;

താവതാ തിട്ഠമാനോ സോ, താരേസി ജനതം ബഹും.

൨൨൭. ‘‘തദാഹം ഹംസവതിയം, ബ്രാഹ്മണോ വേദപാരഗൂ;

ഉപേച്ച സബ്ബലോകഗ്ഗം [സബ്ബസാരഗ്ഗം (സീ.), സത്തപാരഗം (പീ.)], അസ്സോസിം ധമ്മദേസനം.

൨൨൮. ‘‘തദാ സോ സാവകം വീരോ, പഭിന്നമതിഗോചരം;

അത്ഥേ ധമ്മേ നിരുത്തേ ച, പടിഭാനേ ച കോവിദം.

൨൨൯. ‘‘ഠപേസി ഏതദഗ്ഗമ്ഹി, തം സുത്വാ മുദിതോ അഹം;

സസാവകം ജിനവരം, സത്താഹം ഭോജയിം തദാ.

൨൩൦. ‘‘ദുസ്സേഹച്ഛാദയിത്വാന, സസിസ്സം ബുദ്ധിസാഗരം [ബുദ്ധസാഗരം (ക.)];

നിപച്ച പാദമൂലമ്ഹി, തം ഠാനം പത്ഥയിം അഹം.

൨൩൧. ‘‘തതോ അവോച ലോകഗ്ഗോ, ‘പസ്സഥേതം ദിജുത്തമം;

വിനതം പാദമൂലേ മേ, കമലോദരസപ്പഭം.

൨൩൨. ‘‘‘ബുദ്ധസേട്ഠസ്സ [സേട്ഠം ബുദ്ധസ്സ (സ്യാ. ക.)] ഭിക്ഖുസ്സ, ഠാനം പത്ഥയതേ അയം;

തായ സദ്ധായ ചാഗേന, സദ്ധമ്മസ്സവനേന [തേന ധമ്മസ്സവേന (സീ. പീ. ക.)] ച.

൨൩൩. ‘‘‘സബ്ബത്ഥ സുഖിതോ ഹുത്വാ, സംസരിത്വാ ഭവാഭവേ;

അനാഗതമ്ഹി അദ്ധാനേ, ലച്ഛസേ തം മനോരഥം.

൨൩൪. ‘‘‘സതസഹസ്സിതോ കപ്പേ, ഓക്കാകകുലസമ്ഭവോ;

ഗോതമോ നാമ ഗോത്തേന, സത്ഥാ ലോകേ ഭവിസ്സതി.

൨൩൫. ‘‘‘തസ്സ ധമ്മേസു ദായാദോ, ഓരസോ ധമ്മനിമ്മിതോ;

കോട്ഠികോ നാമ നാമേന, ഹേസ്സതി സത്ഥു സാവകോ’.

൨൩൬. ‘‘തം സുത്വാ മുദിതോ ഹുത്വാ, യാവജീവം തദാ ജിനം;

മേത്തചിത്തോ പരിചരിം, സതോ പഞ്ഞാസമാഹിതോ.

൨൩൭. ‘‘തേന കമ്മവിപാകേന, ചേതനാപണിധീഹി ച;

ജഹിത്വാ മാനുസം ദേഹം, താവതിംസമഗച്ഛഹം.

൨൩൮. ‘‘സതാനം തീണിക്ഖത്തുഞ്ച, ദേവരജ്ജമകാരയിം;

സതാനം പഞ്ചക്ഖത്തുഞ്ച, ചക്കവത്തീ അഹോസഹം.

൨൩൯. ‘‘പദേസരജ്ജം വിപുലം, ഗണനാതോ അസങ്ഖിയം;

സബ്ബത്ഥ സുഖിതോ ആസിം, തസ്സ കമ്മസ്സ വാഹസാ.

൨൪൦. ‘‘ദുവേ ഭവേ സംസരാമി, ദേവത്തേ അഥ മാനുസേ;

അഞ്ഞം ഗതിം ന ഗച്ഛാമി, സുചിണ്ണസ്സ ഇദം ഫലം.

൨൪൧. ‘‘ദുവേ കുലേ പജായാമി, ഖത്തിയേ അഥ ബ്രാഹ്മണേ;

‘‘നീചേ കുലേ ന ജായാമി, സുചിണ്ണസ്സ ഇദം ഫലം.

൨൪൨. ‘‘പച്ഛിമേ ഭവേ സമ്പത്തേ, ബ്രഹ്മബന്ധു അഹോസഹം;

സാവത്ഥിയം വിപ്പകുലേ, പച്ചാജാതോ മഹദ്ധനേ.

൨൪൩. ‘‘മാതാ ചന്ദവതീ നാമ, പിതാ മേ അസ്സലായനോ;

യദാ മേ പിതരം ബുദ്ധോ, വിനയീ സബ്ബസുദ്ധിയാ.

൨൪൪. ‘‘തദാ പസന്നോ സുഗതേ, പബ്ബജിം അനഗാരിയം;

മോഗ്ഗല്ലാനോ ആചരിയോ, ഉപജ്ഝാ സാരിസമ്ഭവോ.

൨൪൫. ‘‘കേസേസു ഛിജ്ജമാനേസു, ദിട്ഠി ഛിന്നാ സമൂലികാ;

നിവാസേന്തോ ച കാസാവം, അരഹത്തമപാപുണിം.

൨൪൬. ‘‘അത്ഥധമ്മനിരുത്തീസു, പടിഭാനേ ച മേ മതി;

പഭിന്നാ തേന ലോകഗ്ഗോ, ഏതദഗ്ഗേ ഠപേസി മം.

൨൪൭. ‘‘അസന്ദിട്ഠം വിയാകാസിം, ഉപതിസ്സേന പുച്ഛിതോ;

പടിസമ്ഭിദാസു തേനാഹം, അഗ്ഗോ സമ്ബുദ്ധസാസനേ.

൨൪൮. ‘‘കിലേസാ ഝാപിതാ മയ്ഹം…പേ… വിഹരാമി അനാസവോ.

൨൪൯. ‘‘സ്വാഗതം വത മേ ആസി…പേ… കതം ബുദ്ധസ്സ സാസനം.

൨൫൦. ‘‘പടിസമ്ഭിദാ ചതസ്സോ…പേ… കതം ബുദ്ധസ്സ സാസനം’’.

ഇത്ഥം സുദം ആയസ്മാ മഹാകോട്ഠികോ ഥേരോ ഇമാ ഗാഥായോ

അഭാസിത്ഥാതി.

മഹാകോട്ഠികത്ഥേരസ്സാപദാനം സത്തമം.