൪. ദബ്ബമല്ലപുത്തത്ഥേരഅപദാനം

൧൦൮. ‘‘പദുമുത്തരോ നാമ ജിനോ, സബ്ബലോകവിദൂ മുനി;

ഇതോ സതസഹസ്സമ്ഹി, കപ്പേ ഉപ്പജ്ജി ചക്ഖുമാ.

൧൦൯. ‘‘ഓവാദകോ വിഞ്ഞാപകോ, താരകോ സബ്ബപാണിനം;

ദേസനാകുസലോ ബുദ്ധോ, താരേസി ജനതം ബഹും.

൧൧൦. ‘‘അനുകമ്പകോ കാരുണികോ, ഹിതേസീ സബ്ബപാണിനം;

സമ്പത്തേ തിത്ഥിയേ സബ്ബേ, പഞ്ചസീലേ പതിട്ഠപി [പതിട്ഠഹി (സ്യാ. ക.)].

൧൧൧. ‘‘ഏവം നിരാകുലം ആസി, സുഞ്ഞതം [സുഞ്ഞകം (സീ.) ഏവമുപരിപി] തിത്ഥിയേഹി ച;

വിചിത്തം അരഹന്തേഹി, വസീഭൂതേഹി താദിഭി.

൧൧൨. ‘‘രതനാനട്ഠപഞ്ഞാസം, ഉഗ്ഗതോ സോ മഹാമുനി;

കഞ്ചനഗ്ഘിയസങ്കാസോ, ബാത്തിംസവരലക്ഖണോ.

൧൧൩. ‘‘വസ്സസതസഹസ്സാനി, ആയു വിജ്ജതി താവദേ;

താവതാ തിട്ഠമാനോ സോ, താരേസി ജനതം ബഹും.

൧൧൪. ‘‘തദാഹം ഹംസവതിയം, സേട്ഠിപുത്തോ മഹായസോ;

ഉപേത്വാ ലോകപജ്ജോതം, അസ്സോസിം ധമ്മദേസനം.

൧൧൫. ‘‘സേനാസനാനി ഭിക്ഖൂനം, പഞ്ഞാപേന്തം സസാവകം;

കിത്തയന്തസ്സ വചനം, സുണിത്വാ മുദിതോ അഹം.

൧൧൬. ‘‘അധികാരം സസങ്ഘസ്സ, കത്വാ തസ്സ മഹേസിനോ;

നിപച്ച സിരസാ പാദേ, തം ഠാനമഭിപത്ഥയിം.

൧൧൭. ‘‘തദാഹ സ മഹാവീരോ, മമ കമ്മം പകിത്തയം;

‘യോ സസങ്ഘമഭോജേസി, സത്താഹം ലോകനായകം.

൧൧൮. ‘‘‘സോയം കമലപത്തക്ഖോ, സീഹംസോ കനകത്തചോ;

മമ പാദമൂലേ നിപതി [പതിതോ (പീ.)], പത്ഥയം ഠാനമുത്തമം.

൧൧൯. ‘‘‘സതസഹസ്സിതോ കപ്പേ, ഓക്കാകകുലസമ്ഭവോ;

ഗോതമോ നാമ ഗോത്തേന, സത്ഥാ ലോകേ ഭവിസ്സതി.

൧൨൦. ‘‘‘സാവകോ തസ്സ ബുദ്ധസ്സ, ദബ്ബോ നാമേന വിസ്സുതോ;

സേനാസനപഞ്ഞാപകോ, അഗ്ഗോ ഹേസ്സതിയം തദാ’.

൧൨൧. ‘‘തേന കമ്മേന സുകതേന, ചേതനാപണിധീഹി ച;

ജഹിത്വാ മാനുസം ദേഹം, താവതിംസമഗച്ഛഹം.

൧൨൨. ‘‘സതാനം തീണിക്ഖത്തുഞ്ച, ദേവരജ്ജമകാരയിം;

സതാനം പഞ്ചക്ഖത്തുഞ്ച, ചക്കവത്തീ അഹോസഹം.

൧൨൩. ‘‘പദേസരജ്ജം വിപുലം, ഗണനാതോ അസങ്ഖിയം;

സബ്ബത്ഥ സുഖിതോ ആസിം, തസ്സ കമ്മസ്സ വാഹസാ.

൧൨൪. ‘‘ഏകനവുതിതോ കപ്പേ, വിപസ്സീ നാമ നായകോ;

ഉപ്പജ്ജി ചാരുദസ്സനോ [ചാരുനയനോ (സീ. സ്യാ. പീ.)], സബ്ബധമ്മവിപസ്സകോ.

൧൨൫. ‘‘ദുട്ഠചിത്തോ ഉപവദിം, സാവകം തസ്സ താദിനോ;

സബ്ബാസവപരിക്ഖീണം, സുദ്ധോതി ച വിജാനിയ.

൧൨൬. ‘‘തസ്സേവ നരവീരസ്സ, സാവകാനം മഹേസിനം;

സലാകഞ്ച ഗഹേത്വാന [സലാകം പഗ്ഗഹേത്വാന (സീ. പീ.)], ഖീരോദനമദാസഹം.

൧൨൭. ‘‘ഇമമ്ഹി ഭദ്ദകേ കപ്പേ, ബ്രഹ്മബന്ധു മഹായസോ;

കസ്സപോ നാമ ഗോത്തേന, ഉപ്പജ്ജി വദതം വരോ.

൧൨൮. ‘‘സാസനം ജോതയിത്വാന, അഭിഭുയ്യ കുതിത്ഥിയേ;

വിനേയ്യേ വിനയിത്വാവ, നിബ്ബുതോ സോ സസാവകോ.

൧൨൯. ‘‘സസിസ്സേ നിബ്ബുതേ നാഥേ, അത്ഥമേന്തമ്ഹി സാസനേ;

ദേവാ കന്ദിംസു സംവിഗ്ഗാ, മുത്തകേസാ രുദമ്മുഖാ.

൧൩൦. ‘‘നിബ്ബായിസ്സതി ധമ്മക്ഖോ, ന പസ്സിസ്സാമ സുബ്ബതേ;

ന സുണിസ്സാമ സദ്ധമ്മം, അഹോ നോ അപ്പപുഞ്ഞതാ.

൧൩൧. ‘‘തദായം പഥവീ സബ്ബാ, അചലാ സാ ചലാചലാ [ചലാചലീ (സീ.), പുലാപുലീ (സ്യാ.)];

സാഗരോ ച സസോകോവ, വിനദീ കരുണം ഗിരം.

൧൩൨. ‘‘ചതുദ്ദിസാ ദുന്ദുഭിയോ, നാദയിംസു അമാനുസാ;

സമന്തതോ അസനിയോ, ഫലിംസു ച ഭയാവഹാ.

൧൩൩. ‘‘ഉക്കാ പതിംസു നഭസാ, ധൂമകേതു ച ദിസ്സതി;

സധൂമാ ജാലവട്ടാ ച [സബ്ബഥലജസത്താ ച (സീ.)], രവിംസു കരുണം മിഗാ.

൧൩൪. ‘‘ഉപ്പാദേ ദാരുണേ ദിസ്വാ, സാസനത്ഥങ്ഗസൂചകേ;

സംവിഗ്ഗാ ഭിക്ഖവോ സത്ത, ചിന്തയിമ്ഹ മയം തദാ.

൧൩൫. ‘‘സാസനേന വിനാമ്ഹാകം, ജീവിതേന അലം മയം;

പവിസിത്വാ മഹാരഞ്ഞം, യുഞ്ജാമ ജിനസാസനം.

൧൩൬. ‘‘അദ്ദസമ്ഹ തദാരഞ്ഞേ, ഉബ്ബിദ്ധം സേലമുത്തമം;

നിസ്സേണിയാ തമാരുയ്ഹ, നിസ്സേണിം പാതയിമ്ഹസേ.

൧൩൭. ‘‘തദാ ഓവദി നോ ഥേരോ, ബുദ്ധുപ്പാദോ സുദുല്ലഭോ;

സദ്ധാതിദുല്ലഭാ ലദ്ധാ, ഥോകം സേസഞ്ച സാസനം.

൧൩൮. ‘‘നിപതന്തി ഖണാതീതാ, അനന്തേ ദുക്ഖസാഗരേ;

തസ്മാ പയോഗോ കത്തബ്ബോ, യാവ ഠാതി മുനേ മതം [യാവ തിട്ഠതി സാസനം (സ്യാ.)].

൧൩൯. ‘‘അരഹാ ആസി സോ ഥേരോ, അനാഗാമീ തദാനുഗോ;

സുസീലാ ഇതരേ യുത്താ, ദേവലോകം അഗമ്ഹസേ.

൧൪൦. ‘‘നിബ്ബുതോ തിണ്ണസംസാരോ, സുദ്ധാവാസേ ച ഏകകോ;

അഹഞ്ച പക്കുസാതി ച, സഭിയോ ബാഹിയോ തഥാ.

൧൪൧. ‘‘കുമാരകസ്സപോ ചേവ, തത്ഥ തത്ഥൂപഗാ മയം;

സംസാരബന്ധനാ മുത്താ, ഗോതമേനാനുകമ്പിതാ.

൧൪൨. ‘‘മല്ലേസു കുസിനാരായം, ജാതോ ഗബ്ഭേവ മേ സതോ;

മാതാ മതാ ചിതാരുള്ഹാ, തതോ നിപ്പതിതോ അഹം.

൧൪൩. ‘‘പതിതോ ദബ്ബപുഞ്ജമ്ഹി, തതോ ദബ്ബോതി വിസ്സുതോ;

ബ്രഹ്മചാരീബലേനാഹം, വിമുത്തോ സത്തവസ്സികോ.

൧൪൪. ‘‘ഖീരോദനബലേനാഹം, പഞ്ചഹങ്ഗേഹുപാഗതോ;

ഖീണാസവോപവാദേന, പാപേഹി ബഹുചോദിതോ.

൧൪൫. ‘‘ഉഭോ പുഞ്ഞഞ്ച പാപഞ്ച, വീതിവത്തോമ്ഹി ദാനിഹം;

പത്വാന പരമം സന്തിം, വിഹരാമി അനാസവോ.

൧൪൬. ‘‘സേനാസനം പഞ്ഞാപയിം, ഹാസയിത്വാന സുബ്ബതേ;

ജിനോ തസ്മിം ഗുണേ തുട്ഠോ, ഏതദഗ്ഗേ ഠപേസി മം.

൧൪൭. ‘‘കിലേസാ ഝാപിതാ മയ്ഹം…പേ… വിഹരാമി അനാസവോ.

൧൪൮. ‘‘സ്വാഗതം വത മേ ആസി…പേ… കതം ബുദ്ധസ്സ സാസനം.

൧൪൯. ‘‘പടിസമ്ഭിദാ ചതസ്സോ…പേ… കതം ബുദ്ധസ്സ സാസനം’’.

ഇത്ഥം സുദം ആയസ്മാ ദബ്ബമല്ലപുത്തോ ഥേരോ ഇമാ ഗാഥായോ

അഭാസിത്ഥാതി.

ദബ്ബമല്ലപുത്തത്ഥേരസ്സാപദാനം ചതുത്ഥം.