൮. പുലിനഥൂപിയത്ഥേരഅപദാനം

൫൭. ‘‘ഹിമവന്തസ്സാവിദൂരേ, യമകോ നാമ പബ്ബതോ;

അസ്സമോ സുകതോ മയ്ഹം, പണ്ണസാലാ സുമാപിതാ.

൫൮. ‘‘നാരദോ നാമ നാമേന, ജടിലോ ഉഗ്ഗതാപനോ;

ചതുദ്ദസസഹസ്സാനി, സിസ്സാ പരിചരന്തി മം.

൫൯. ‘‘പടിസല്ലീനകോ സന്തോ, ഏവം ചിന്തേസഹം തദാ;

‘സബ്ബോ ജനോ മം പൂജേതി, നാഹം പൂജേമി കിഞ്ചനം.

൬൦. ‘‘‘ന മേ ഓവാദകോ അത്ഥി, വത്താ കോചി ന വിജ്ജതി;

അനാചരിയുപജ്ഝായോ, വനേ വാസം ഉപേമഹം.

൬൧. ‘‘‘ഉപാസമാനോ യമഹം, ഗരുചിത്തം ഉപട്ഠഹേ;

സോ മേ ആചരിയോ നത്ഥി, വനവാസോ നിരത്ഥകോ.

൬൨. ‘‘‘ആയാഗം മേ ഗവേസിസ്സം, ഗരും ഭാവനിയം തഥാ;

സാവസ്സയോ വസിസ്സാമി, ന കോചി ഗരഹിസ്സതി’.

൬൩. ‘‘ഉത്താനകൂലാ നദികാ, സുപതിത്ഥാ മനോരമാ;

സംസുദ്ധപുലിനാകിണ്ണാ, അവിദൂരേ മമസ്സമം.

൬൪. ‘‘നദിം അമരികം നാമ, ഉപഗന്ത്വാനഹം തദാ;

സംവഡ്ഢയിത്വാ പുലിനം, അകം പുലിനചേതിയം.

൬൫. ‘‘യേ തേ അഹേസും സമ്ബുദ്ധാ, ഭവന്തകരണാ മുനീ;

തേസം ഏതാദിസോ ഥൂപോ, തം നിമിത്തം കരോമഹം.

൬൬. ‘‘കരിത്വാ പുലിനം [പുളിനേ (സീ. സ്യാ. പീ.)] ഥൂപം, സോവണ്ണം മാപയിം അഹം;

സോണ്ണകിങ്കണിപുപ്ഫാനി, സഹസ്സേ തീണി പൂജയിം.

൬൭. ‘‘സായപാതം നമസ്സാമി, വേദജാതോ കതഞ്ജലീ;

സമ്മുഖാ വിയ സമ്ബുദ്ധം, വന്ദിം പുലിനചേതിയം.

൬൮. ‘‘യദാ കിലേസാ ജായന്തി, വിതക്കാ ഗേഹനിസ്സിതാ;

സരാമി സുകതം ഥൂപം, പച്ചവേക്ഖാമി താവദേ.

൬൯. ‘‘ഉപനിസ്സായ വിഹരം, സത്ഥവാഹം വിനായകം;

കിലേസേ സംവസേയ്യാസി, ന യുത്തം തവ മാരിസ.

൭൦. ‘‘സഹ ആവജ്ജിതേ ഥൂപേ, ഗാരവം ഹോതി മേ തദാ;

കുവിതക്കേ വിനോദേസിം, നാഗോ തുത്തട്ടിതോ യഥാ.

൭൧. ‘‘ഏവം വിഹരമാനം മം, മച്ചുരാജാഭിമദ്ദഥ;

തത്ഥ കാലങ്കതോ സന്തോ, ബ്രഹ്മലോകമഗച്ഛഹം.

൭൨. ‘‘യാവതായും വസിത്വാന, തിദിവേ [തിദസേ (സീ. പീ.)] ഉപപജ്ജഹം;

അസീതിക്ഖത്തും ദേവിന്ദോ, ദേവരജ്ജമകാരയിം.

൭൩. ‘‘സതാനം തീണിക്ഖത്തുഞ്ച, ചക്കവത്തീ അഹോസഹം;

പദേസരജ്ജം വിപുലം, ഗണനാതോ അസങ്ഖിയം.

൭൪. ‘‘സോണ്ണകിങ്കണിപുപ്ഫാനം [തേസം കിങ്കണിപുപ്ഫാനം (സീ.)], വിപാകം അനുഭോമഹം;

ധാതീസതസഹസ്സാനി, പരിവാരേന്തി മം [മേ (ക.)] ഭവേ.

൭൫. ‘‘ഥൂപസ്സ പരിചിണ്ണത്താ, രജോജല്ലം ന ലിമ്പതി;

ഗത്തേ സേദാ ന മുച്ചന്തി, സുപ്പഭാസോ ഭവാമഹം.

൭൬. ‘‘അഹോ മേ സുകതോ ഥൂപോ, സുദിട്ഠാമരികാ നദീ;

ഥൂപം കത്വാന പുലിനം, പത്തോമ്ഹി അചലം പദം.

൭൭. ‘‘കുസലം കത്തുകാമേന, ജന്തുനാ സാരഗാഹിനാ;

നത്ഥി ഖേത്തം അഖേത്തം വാ, പടിപത്തീവ സാധകാ [സാരികാ (പീ.), സാരകാ (സ്യാ.), സാരതാ (ക.)].

൭൮. ‘‘യഥാപി ബലവാ പോസോ, അണ്ണവം തരിതുസ്സഹേ;

പരിത്തം കട്ഠമാദായ, പക്ഖന്ദേയ്യ മഹാസരം.

൭൯. ‘‘ഇമാഹം കട്ഠം നിസ്സായ, തരിസ്സാമി മഹോദധിം;

ഉസ്സാഹേന വീരിയേന, തരേയ്യ ഉദധിം നരോ.

൮൦. ‘‘തഥേവ മേ കതം കമ്മം, പരിത്തം ഥോകകഞ്ച യം;

തം കമ്മം ഉപനിസ്സായ, സംസാരം സമതിക്കമിം.

൮൧. ‘‘പച്ഛിമേ ഭവേ സമ്പത്തേ, സുക്കമൂലേന ചോദിതോ;

സാവത്ഥിയം പുരേ ജാതോ, മഹാസാലേ സുഅഡ്ഢകേ.

൮൨. ‘‘സദ്ധാ മാതാ പിതാ മയ്ഹം, ബുദ്ധസ്സ സരണം ഗതാ;

ഉഭോ ദിട്ഠപദാ ഏതേ, അനുവത്തന്തി സാസനം.

൮൩. ‘‘ബോധിപപടികം ഗയ്ഹ, സോണ്ണഥൂപമകാരയും;

സായപാതം [സായം പാതം (സ്യാ. ക.)] നമസ്സന്തി, സക്യപുത്തസ്സ സമ്മുഖാ.

൮൪. ‘‘ഉപോസഥമ്ഹി ദിവസേ, സോണ്ണഥൂപം വിനീഹരും;

ബുദ്ധസ്സ വണ്ണം കിത്തേന്താ, തിയാമം വീതിനാമയും.

൮൫. ‘‘സഹ ദിസ്വാനഹം [പസാദേത്വാനഹം (ക.)] ഥൂപം, സരിം പുലിനചേതിയം;

ഏകാസനേ നിസീദിത്വാ, അരഹത്തമപാപുണിം.

ദ്വാവീസതിമം ഭാണവാരം.

൮൬. ‘‘ഗവേസമാനോ തം വീരം, ധമ്മസേനാപതിദ്ദസം;

അഗാരാ നിക്ഖമിത്വാന, പബ്ബജിം തസ്സ സന്തികേ.

൮൭. ‘‘ജാതിയാ സത്തവസ്സേന, അരഹത്തമപാപുണിം;

ഉപസമ്പാദയീ ബുദ്ധോ, ഗുണമഞ്ഞായ ചക്ഖുമാ.

൮൮. ‘‘ദാരകേനേവ സന്തേന, കിരിയം നിട്ഠിതം മയാ;

കതം മേ കരണീയജ്ജ, സക്യപുത്തസ്സ സാസനേ.

൮൯. ‘‘സബ്ബവേരഭയാതീതോ, സബ്ബസങ്ഗാതിഗോ [സബ്ബസങ്കാതിതോ (ക.)] ഇസി;

സാവകോ തേ മഹാവീര, സോണ്ണഥൂപസ്സിദം ഫലം.

൯൦. ‘‘കിലേസാ ഝാപിതാ മയ്ഹം…പേ… വിഹരാമി അനാസവോ.

൯൧. ‘‘സ്വാഗതം വത മേ ആസി…പേ… കതം ബുദ്ധസ്സ സാസനം.

൯൨. ‘‘പടിസമ്ഭിദാ ചതസ്സോ…പേ… കതം ബുദ്ധസ്സ സാസനം’’.

ഇത്ഥം സുദം ആയസ്മാ പുലിനഥൂപിയോ ഥേരോ ഇമാ ഗാഥായോ

അഭാസിത്ഥാതി.

പുലിനഥൂപിയത്ഥേരസ്സാപദാനം അട്ഠമം.