൫. ചന്ദനമാലിയത്ഥേരഅപദാനം

൭൫. ‘‘പഞ്ച കാമഗുണേ ഹിത്വാ, പിയരൂപേ മനോരമേ;

അസീതികോടിയോ ഹിത്വാ, പബ്ബജിം അനഗാരിയം.

൭൬. ‘‘പബ്ബജിത്വാന കായേന, പാപകമ്മം വിവജ്ജയിം;

വചീദുച്ചരിതം ഹിത്വാ, നദീകൂലേ വസാമഹം.

൭൭. ‘‘ഏകകം മം വിഹരന്തം, ബുദ്ധസേട്ഠോ ഉപാഗമി;

നാഹം ജാനാമി ബുദ്ധോതി, അകാസിം പടിസന്ഥരം [പടിസന്ധാരം (ക.)].

൭൮. ‘‘കരിത്വാ പടിസന്ഥാരം, നാമഗോത്തമപുച്ഛഹം;

‘ദേവതാനുസി ഗന്ധബ്ബോ, അദു സക്കോ പുരിന്ദദോ.

൭൯. ‘‘‘കോ വാ ത്വം കസ്സ വാ പുത്തോ, മഹാബ്രഹ്മാ ഇധാഗതോ;

വിരോചേസി ദിസാ സബ്ബാ, ഉദയം സൂരിയോ യഥാ.

൮൦. ‘‘‘സഹസ്സാരാനി ചക്കാനി, പാദേ ദിസ്സന്തി മാരിസ;

കോ വാ ത്വം കസ്സ വാ പുത്തോ, കഥം ജാനേമു തം മയം;

നാമഗോത്തം പവേദേഹി, സംസയം അപനേഹി മേ’.

൮൧. ‘‘‘നമ്ഹി ദേവോ ന ഗന്ധബ്ബോ, നമ്ഹി [നാപി (സീ.)] സക്കോ പുരിന്ദദോ;

ബ്രഹ്മഭാവോ ച മേ നത്ഥി, ഏതേസം ഉത്തമോ അഹം.

൮൨. ‘‘‘അതീതോ വിസയം തേസം, ദാലയിം കാമബന്ധനം;

സബ്ബേ കിലേസേ ഝാപേത്വാ, പത്തോ സമ്ബോധിമുത്തമം’.

൮൩. ‘‘തസ്സ വാചം സുണിത്വാഹം, ഇദം വചനമബ്രവിം;

‘യദി ബുദ്ധോതി സബ്ബഞ്ഞൂ, നിസീദ ത്വം മഹാമുനേ.

൮൪. ‘തമഹം പൂജയിസ്സാമി, ദുക്ഖസ്സന്തകരോ തുവം’;

‘‘പത്ഥരിത്വാ ജിനചമ്മം, അദാസി സത്ഥുനോ അഹം.

൮൫. ‘‘നിസീദി തത്ഥ ഭഗവാ, സീഹോവ ഗിരിഗബ്ഭരേ;

ഖിപ്പം പബ്ബതമാരുയ്ഹ, അമ്ബസ്സ ഫലമഗ്ഗഹിം.

൮൬. ‘‘സാലകല്യാണികം പുപ്ഫം, ചന്ദനഞ്ച മഹാരഹം;

ഖിപ്പം പഗ്ഗയ്ഹ തം സബ്ബം, ഉപേത്വാ ലോകനായകം.

൮൭. ‘‘ഫലം ബുദ്ധസ്സ ദത്വാന, സാലപുപ്ഫമപൂജയിം;

ചന്ദനം അനുലിമ്പിത്വാ, അവന്ദിം സത്ഥുനോ അഹം.

൮൮. ‘‘പസന്നചിത്തോ സുമനോ, വിപുലായ ച പീതിയാ;

അജിനമ്ഹി നിസീദിത്വാ, സുമേധോ ലോകനായകോ.

൮൯. ‘‘മമ കമ്മം പകിത്തേസി, ഹാസയന്തോ മമം തദാ;

‘ഇമിനാ ഫലദാനേന, ഗന്ധമാലേഹി ചൂഭയം.

൯൦. ‘‘‘പഞ്ചവീസേ കപ്പസതേ, ദേവലോകേ രമിസ്സതി;

അനൂനമനസങ്കപ്പോ, വസവത്തീ ഭവിസ്സതി.

൯൧. ‘‘‘ഛബ്ബീസതികപ്പസതേ, മനുസ്സത്തം ഗമിസ്സതി;

ഭവിസ്സതി ചക്കവത്തീ, ചാതുരന്തോ മഹിദ്ധികോ.

൯൨. ‘‘‘വേഭാരം നാമ നഗരം, വിസ്സകമ്മേന മാപിതം;

ഹേസ്സതി സബ്ബസോവണ്ണം, നാനാരതനഭൂസിതം.

൯൩. ‘‘‘ഏതേനേവ ഉപായേന, സംസരിസ്സതി സോ ഭവേ [യോനിസോ (സ്യാ. പീ.)];

സബ്ബത്ഥ പൂജിതോ ഹുത്വാ, ദേവത്തേ അഥ മാനുസേ.

൯൪. ‘‘‘പച്ഛിമേ ഭവേ സമ്പത്തേ, ബ്രഹ്മബന്ധു ഭവിസ്സതി;

അഗാരാ അഭിനിക്ഖമ്മ, അനഗാരീ ഭവിസ്സതി;

അഭിഞ്ഞാപാരഗൂ ഹുത്വാ, നിബ്ബായിസ്സതിനാസവോ’.

൯൫. ‘‘ഇദം വത്വാന സമ്ബുദ്ധോ, സുമേധോ ലോകനായകോ;

മമ നിജ്ഝായമാനസ്സ, പക്കാമി അനിലഞ്ജസേ.

൯൬. ‘‘തേന കമ്മേന സുകതേന, ചേതനാപണിധീഹി ച;

ജഹിത്വാ മാനുസം ദേഹം, താവതിംസമഗച്ഛഹം.

൯൭. ‘‘തുസിതതോ ചവിത്വാന, നിബ്ബത്തിം മാതുകുച്ഛിയം;

ഭോഗേ മേ ഊനതാ നത്ഥി, യമ്ഹി ഗബ്ഭേ വസാമഹം.

൯൮. ‘‘മാതുകുച്ഛിഗതേ മയി, അന്നപാനഞ്ച ഭോജനം;

മാതുയാ മമ ഛന്ദേന, നിബ്ബത്തതി യദിച്ഛകം.

൯൯. ‘‘ജാതിയാ പഞ്ചവസ്സേന, പബ്ബജിം അനഗാരിയം;

ഓരോപിതമ്ഹി കേസമ്ഹി, അരഹത്തമപാപുണിം.

൧൦൦. ‘‘പുബ്ബകമ്മം ഗവേസന്തോ, ഓരേന നാദ്ദസം അഹം;

തിംസകപ്പസഹസ്സമ്ഹി, മമ കമ്മമനുസ്സരിം.

൧൦൧. ‘‘നമോ തേ പുരിസാജഞ്ഞ, നമോ തേ പുരിസുത്തമ;

തവ സാസനമാഗമ്മ, പത്തോമ്ഹി അചലം പദം.

൧൦൨. ‘‘തിംസകപ്പസഹസ്സമ്ഹി, യം ബുദ്ധമഭിപൂജയിം;

ദുഗ്ഗതിം നാഭിജാനാമി, ബുദ്ധപൂജായിദം ഫലം.

൧൦൩. ‘‘കിലേസാ ഝാപിതാ മയ്ഹം…പേ… വിഹരാമി അനാസവോ.

൧൦൪. ‘‘സ്വാഗതം വത മേ ആസി…പേ… കതം ബുദ്ധസ്സ സാസനം.

൧൦൫. ‘‘പടിസമ്ഭിദാ ചതസ്സോ…പേ… കതം ബുദ്ധസ്സ സാസനം’’.

ഇത്ഥം സുദം ആയസ്മാ ചന്ദനമാലിയോ ഥേരോ ഇമാ ഗാഥായോ

അഭാസിത്ഥാതി.

ചന്ദനമാലിയത്ഥേരസ്സാപദാനം പഞ്ചമം.