൪. മധുദായകത്ഥേരഅപദാനം

൩൩൩. ‘‘സിന്ധുയാ നദിയാ തീരേ, സുകതോ അസ്സമോ മമ;

തത്ഥ വാചേമഹം സിസ്സേ, ഇതിഹാസം സലക്ഖണം.

൩൩൪. ‘‘ധമ്മകാമാ വിനീതാ തേ, സോതുകാമാ സുസാസനം;

ഛളങ്ഗേ പാരമിപ്പത്താ, സിന്ധുകൂലേ വസന്തി തേ.

൩൩൫. ‘‘ഉപ്പാതഗമനേ ചേവ, ലക്ഖണേസു ച കോവിദാ;

ഉത്തമത്ഥം ഗവേസന്താ, വസന്തി വിപിനേ തദാ.

൩൩൬. ‘‘സുമേധോ നാമ സമ്ബുദ്ധോ, ലോകേ ഉപ്പജ്ജി താവദേ;

അമ്ഹാകം അനുകമ്പന്തോ, ഉപാഗച്ഛി വിനായകോ.

൩൩൭. ‘‘ഉപാഗതം മഹാവീരം, സുമേധം ലോകനായകം;

തിണസന്ഥാരകം കത്വാ, ലോകജേട്ഠസ്സദാസഹം.

൩൩൮. ‘‘വിപിനാതോ മധും ഗയ്ഹ, ബുദ്ധസേട്ഠസ്സദാസഹം;

സമ്ബുദ്ധോ പരിഭുഞ്ജിത്വാ, ഇദം വചനമബ്രവി.

൩൩൯. ‘‘‘യോ തം അദാസി മധും മേ, പസന്നോ സേഹി പാണിഭി;

തമഹം കിത്തയിസ്സാമി, സുണാഥ മമ ഭാസതോ.

൩൪൦. ‘‘‘ഇമിനാ മധുദാനേന, തിണസന്ഥാരകേന ച;

തിംസ കപ്പസഹസ്സാനി, ദേവലോകേ രമിസ്സതി.

൩൪൧. ‘‘‘തിംസ കപ്പസഹസ്സമ്ഹി, ഓക്കാകകുലസമ്ഭവോ;

ഗോതമോ നാമ ഗോത്തേന, സത്ഥാ ലോകേ ഭവിസ്സതി.

൩൪൨. ‘‘‘തസ്സ ധമ്മേസു ദായാദോ, ഓരസോ ധമ്മനിമ്മിതോ;

സബ്ബാസവേ പരിഞ്ഞായ, നിബ്ബായിസ്സതിനാസവോ.

൩൪൩. ‘‘‘ദേവലോകാ ഇധാഗന്ത്വാ, മാതുകുച്ഛിം ഉപാഗതേ;

മധുവസ്സം പവസ്സിത്ഥ, ഛാദയം മധുനാ മഹിം’.

൩൪൪. ‘‘മയി നിക്ഖന്തമത്തമ്ഹി, കുച്ഛിയാ ച സുദുത്തരാ;

തത്രാപി മധുവസ്സം മേ, വസ്സതേ നിച്ചകാലികം.

൩൪൫. ‘‘അഗാരാ അഭിനിക്ഖമ്മ, പബ്ബജിം അനഗാരിയം;

ലാഭീ അന്നസ്സ പാനസ്സ, മധുദാനസ്സിദം ഫലം.

൩൪൬. ‘‘സബ്ബകാമസമിദ്ധോഹം, ഭവിത്വാ ദേവമാനുസേ;

തേനേവ മധുദാനേന, പത്തോമ്ഹി ആസവക്ഖയം.

൩൪൭. ‘‘വുട്ഠമ്ഹി ദേവേ ചതുരങ്ഗുലേ തിണേ, സമ്പുപ്ഫിതേ [സുപുപ്ഫിതേ (സ്യാ.)] ധരണീരുഹേ സഞ്ഛന്നേ [വപ്പദേസേ (സ്യാ.)];

സുഞ്ഞേ ഘരേ മണ്ഡപരുക്ഖമൂലകേ, വസാമി നിച്ചം സുഖിതോ അനാസവോ.

൩൪൮. ‘‘മജ്ഝേ മഹന്തേ ഹീനേ ച [മജ്ഝേ മയ്ഹം ഭവാ അസ്സു (സ്യാ. പീ. ക.)], ഭവേ സബ്ബേ അതിക്കമിം [യേ ഭവേ സമതിക്കമിം (സ്യാ. ക.), യോ ഭവേസു പകിത്തയി (ക.)];

അജ്ജ മേ ആസവാ ഖീണാ, നത്ഥി ദാനി പുനബ്ഭവോ.

൩൪൯. ‘‘തിംസകപ്പസഹസ്സമ്ഹി, യം ദാനമദദിം തദാ;

ദുഗ്ഗതിം നാഭിജാനാമി, മധുദാനസ്സിദം ഫലം.

൩൫൦. ‘‘കിലേസാ ഝാപിതാ മയ്ഹം, ഭവാ സബ്ബേ സമൂഹതാ;

സബ്ബാസവാ പരിക്ഖീണാ, നത്ഥി ദാനി പുനബ്ഭവോ.

൩൫൧. ‘‘സ്വാഗതം വത മേ ആസി…പേ… കതം ബുദ്ധസ്സ സാസനം.

൩൫൨. ‘‘പടിസമ്ഭിദാ ചതസ്സോ…പേ… കതം ബുദ്ധസ്സ സാസനം’’.

ഇത്ഥം സുദം ആയസ്മാ മധുദായകോ ഥേരോ ഇമാ ഗാഥായോ അഭാസിത്ഥാതി.

മധുദായകത്ഥേരസ്സാപദാനം ചതുത്ഥം.