൫. പദുമകൂടാഗാരിയത്ഥേരഅപദാനം

൩൫൩. ‘‘പിയദസ്സീ നാമ ഭഗവാ, സയമ്ഭൂ ലോകനായകോ;

വിവേകകാമോ സമ്ബുദ്ധോ, സമാധികുസലോ മുനി.

൩൫൪. ‘‘വനസണ്ഡം സമോഗയ്ഹ, പിയദസ്സീ മഹാമുനി;

പംസുകൂലം പത്ഥരിത്വാ, നിസീദി പുരിസുത്തമോ.

൩൫൫. ‘‘മിഗലുദ്ദോ പുരേ ആസിം, അരഞ്ഞേ [വിപിനേ (സീ.), ഇരിനേ (സ്യാ. ക.)] കാനനേ അഹം;

പസദം മിഗമേസന്തോ, ആഹിണ്ഡാമി അഹം തദാ.

൩൫൬. ‘‘തത്ഥദ്ദസാസിം സമ്ബുദ്ധം, ഓഘതിണ്ണമനാസവം;

പുപ്ഫിതം സാലരാജംവ, സതരംസിംവ ഉഗ്ഗതം.

൩൫൭. ‘‘ദിസ്വാനഹം ദേവദേവം, പിയദസ്സിം മഹായസം;

ജാതസ്സരം സമോഗയ്ഹ, പദുമം ആഹരിം തദാ.

൩൫൮. ‘‘ആഹരിത്വാന പദുമം, സതപത്തം മനോരമം;

കൂടാഗാരം കരിത്വാന, ഛാദയിം പദുമേനഹം.

൩൫൯. ‘‘അനുകമ്പകോ കാരുണികോ, പിയദസ്സീ മഹാമുനി;

സത്തരത്തിന്ദിവം ബുദ്ധോ, കൂടാഗാരേ വസീ ജിനോ.

൩൬൦. ‘‘പുരാണം ഛഡ്ഡയിത്വാന, നവേന ഛാദയിം അഹം;

അഞ്ജലിം പഗ്ഗഹേത്വാന, അട്ഠാസിം താവദേ അഹം.

൩൬൧. ‘‘വുട്ഠഹിത്വാ സമാധിമ്ഹാ, പിയദസ്സീ മഹാമുനി;

ദിസം അനുവിലോകേന്തോ, നിസീദി ലോകനായകോ.

൩൬൨. ‘‘തദാ സുദസ്സനോ നാമ, ഉപട്ഠാകോ മഹിദ്ധികോ;

ചിത്തമഞ്ഞായ ബുദ്ധസ്സ, പിയദസ്സിസ്സ സത്ഥുനോ.

൩൬൩. ‘‘അസീതിയാ സഹസ്സേഹി, ഭിക്ഖൂഹി പരിവാരിതോ;

വനന്തേ സുഖമാസീനം, ഉപേസി ലോകനായകം.

൩൬൪. ‘‘യാവതാ വനസണ്ഡമ്ഹി, അധിവത്ഥാ ച ദേവതാ;

ബുദ്ധസ്സ ചിത്തമഞ്ഞായ, സബ്ബേ സന്നിപതും തദാ.

൩൬൫. ‘‘സമാഗതേസു യക്ഖേസു, കുമ്ഭണ്ഡേ സഹരക്ഖസേ;

ഭിക്ഖുസങ്ഘേ ച സമ്പത്തേ, ഗാഥാ പബ്യാഹരീ [സബ്യാഹരീ (സ്യാ.), മാബ്യാഹരീ (സീ.)] ജിനോ.

൩൬൬. ‘‘‘യോ മം സത്താഹം പൂജേസി, ആവാസഞ്ച അകാസി മേ;

തമഹം കിത്തയിസ്സാമി, സുണാഥ മമ ഭാസതോ.

൩൬൭. ‘‘‘സുദുദ്ദസം സുനിപുണം, ഗമ്ഭീരം സുപ്പകാസിതം;

ഞാണേന കിത്തയിസ്സാമി, സുണാഥ മമ ഭാസതോ.

൩൬൮. ‘‘‘ചതുദ്ദസാനി കപ്പാനി, ദേവരജ്ജം കരിസ്സതി;

കൂടാഗാരം മഹന്തസ്സ [ബ്രഹം തസ്സ (സീ. സ്യാ.)], പദ്മപുപ്ഫേഹി ഛാദിതം.

൩൬൯. ‘‘‘ആകാസേ ധാരയിസ്സതി, പുപ്ഫകമ്മസ്സിദം [പുബ്ബകമ്മസ്സിദം (സ്യാ.)] ഫലം;

ചതുബ്ബീസേ [ചതുദ്ദസേ (സ്യാ.)] കപ്പസതേ, വോകിണ്ണം സംസരിസ്സതി.

൩൭൦. ‘‘‘തത്ഥ പുപ്ഫമയം ബ്യമ്ഹം, ആകാസേ ധാരയിസ്സതി;

യഥാ പദുമപത്തമ്ഹി, തോയം ന ഉപലിമ്പതി.

൩൭൧. ‘‘‘തഥേവീമസ്സ ഞാണമ്ഹി, കിലേസാ നോപലിമ്പരേ;

മനസാ വിനിവട്ടേത്വാ, പഞ്ച നീവരണേ അയം.

൩൭൨. ‘‘‘ചിത്തം ജനേത്വാ നേക്ഖമ്മേ, അഗാരാ പബ്ബജിസ്സതി;

തതോ പുപ്ഫമയേ ബ്യമ്ഹേ, ധാരേന്തേ [പുപ്ഫമയം ബ്യമ്ഹം, ധാരേന്തം (സ്യാ. ക.)] നിക്ഖമിസ്സതി.

൩൭൩. ‘‘‘രുക്ഖമൂലേ വസന്തസ്സ, നിപകസ്സ സതീമതോ;

തത്ഥ പുപ്ഫമയം ബ്യമ്ഹം, മത്ഥകേ ധാരയിസ്സതി.

൩൭൪. ‘‘‘ചീവരം പിണ്ഡപാതഞ്ച, പച്ചയം സയനാസനം;

ദത്വാന ഭിക്ഖുസങ്ഘസ്സ, നിബ്ബായിസ്സതിനാസവോ’.

൩൭൫. ‘‘കൂടാഗാരേന ചരതാ [ചരണാ (സീ. പീ. ക.), ചരിതേ (സ്യാ.)], പബ്ബജ്ജം അഭിനിക്ഖമിം;

രുക്ഖമൂലേ വസന്തമ്പി [വസന്തമ്ഹി (സീ.), വസതോപി (?)], കൂടാഗാരം ധരീയതി.

൩൭൬. ‘‘ചീവരേ പിണ്ഡപാതേ ച, ചേതനാ മേ ന വിജ്ജതി;

പുഞ്ഞകമ്മേന സംയുത്തോ, ലഭാമി പരിനിട്ഠിതം.

൩൭൭. ‘‘ഗണനാതോ അസങ്ഖേയ്യാ, കപ്പകോടീ ബഹൂ മമ;

രിത്തകാ തേ അതിക്കന്താ, പമുത്താ ലോകനായകാ.

൩൭൮. ‘‘അട്ഠാരസേ കപ്പസതേ, പിയദസ്സീ വിനായകോ;

തമഹം പയിരുപാസിത്വാ, ഇമം യോനിം ഉപാഗതോ.

൩൭൯. ‘‘ഇധ പസ്സാമി [ഇധദ്ദസാസിം (സീ.)] സമ്ബുദ്ധം, അനോമം നാമ ചക്ഖുമം;

തമഹം ഉപഗന്ത്വാന, പബ്ബജിം അനഗാരിയം.

൩൮൦. ‘‘ദുക്ഖസ്സന്തകരോ ബുദ്ധോ, മഗ്ഗം മേ ദേസയീ ജിനോ;

തസ്സ ധമ്മം സുണിത്വാന, പത്തോമ്ഹി അചലം പദം.

൩൮൧. ‘‘തോസയിത്വാന സമ്ബുദ്ധം, ഗോതമം സക്യപുങ്ഗവം;

സബ്ബാസവേ പരിഞ്ഞായ, വിഹരാമി അനാസവോ.

൩൮൨. ‘‘അട്ഠാരസേ കപ്പസതേ, യം ബുദ്ധമഭിപൂജയിം;

ദുഗ്ഗതിം നാഭിജാനാമി, ബുദ്ധപൂജായിദം ഫലം.

൩൮൩. ‘‘കിലേസാ ഝാപിതാ മയ്ഹം, ഭവാ സബ്ബേ സമൂഹതാ;

സബ്ബാസവാ പരിക്ഖീണാ, നത്ഥി ദാനി പുനബ്ഭവോ.

൩൮൪. ‘‘സ്വാഗതം വത മേ ആസി…പേ… കതം ബുദ്ധസ്സ സാസനം.

൩൮൫. ‘‘പടിസമ്ഭിദാ ചതസ്സോ…പേ… കതം ബുദ്ധസ്സ സാസനം’’.

ഇത്ഥം സുദം ആയസ്മാ പദുമകൂടാഗാരിയോ ഥേരോ ഇമാ ഗാഥായോ അഭാസിത്ഥാതി.

പദുമകൂടാഗാരിയത്ഥേരസ്സാപദാനം പഞ്ചമം.