൧൦. അജിതത്ഥേരഅപദാനം

൪൮൪. ‘‘പദുമുത്തരോ നാമ ജിനോ, സബ്ബധമ്മാന പാരഗൂ;

അജ്ഝോഗാഹേത്വാ ഹിമവന്തം, നിസീദി ലോകനായകോ.

൪൮൫. ‘‘നാഹം അദ്ദക്ഖിം [പസ്സാമി (?)] സമ്ബുദ്ധം, നപി സദ്ദം സുണോമഹം;

മമ ഭക്ഖം ഗവേസന്തോ, ആഹിണ്ഡാമി വനേ അഹം [തദാ (സീ.)].

൪൮൬. ‘‘തത്ഥദ്ദസ്സാസിം സമ്ബുദ്ധം, ദ്വത്തിംസവരലക്ഖണം;

ദിസ്വാന വിത്തിമാപജ്ജിം [ചിത്തമാപജ്ജി (സീ.), ചിത്തമാപജ്ജിം (സ്യാ.)], സത്തോ കോ നാമയം ഭവേ.

൪൮൭. ‘‘ലക്ഖണാനി വിലോകേത്വാ, മമ വിജ്ജം അനുസ്സരിം;

സുതഞ്ഹി മേതം വുഡ്ഢാനം, പണ്ഡിതാനം സുഭാസിതം.

൪൮൮. ‘‘തേസം യഥാ തം വചനം, അയം ബുദ്ധോ ഭവിസ്സതി;

യംനൂനാഹം സക്കരേയ്യം, ഗതിം മേ സോധയിസ്സതി.

൪൮൯. ‘‘ഖിപ്പം അസ്സമമാഗന്ത്വാ, മധുതേലം ഗഹിം അഹം;

കോലമ്ബകം ഗഹേത്വാന, ഉപഗച്ഛിം വിനായകം [നരാസഭം (സീ.)].

൪൯൦. ‘‘തിദണ്ഡകേ ഗഹേത്വാന, അബ്ഭോകാസേ ഠപേസഹം;

പദീപം പജ്ജലിത്വാന, അട്ഠക്ഖത്തും അവന്ദഹം.

൪൯൧. ‘‘സത്തരത്തിന്ദിവം ബുദ്ധോ, നിസീദി പുരിസുത്തമോ;

തതോ രത്യാ വിവസാനേ, വുട്ഠാസി ലോകനായകോ.

൪൯൨. ‘‘പസന്നചിത്തോ സുമനോ, സബ്ബരത്തിന്ദിവം അഹം;

ദീപം ബുദ്ധസ്സ പാദാസിം, പസന്നോ സേഹി പാണിഭി.

൪൯൩. ‘‘സബ്ബേ വനാ ഗന്ധമയാ, പബ്ബതേ ഗന്ധമാദനേ;

ബുദ്ധസ്സ ആനുഭാവേന, ആഗച്ഛും ബുദ്ധസന്തികം [ഉപഗച്ഛും തദാ ജിനം (സീ.)].

൪൯൪. ‘‘യേ കേചി പുപ്ഫഗന്ധാസേ, പുപ്ഫിതാ ധരണീരുഹാ;

ബുദ്ധസ്സ ആനുഭാവേന, സബ്ബേ സന്നിപതും തദാ.

൪൯൫. ‘‘യാവതാ ഹിമവന്തമ്ഹി, നാഗാ ച ഗരുളാ ഉഭോ;

ധമ്മഞ്ച സോതുകാമാ തേ, ആഗച്ഛും ബുദ്ധസന്തികം.

൪൯൬. ‘‘ദേവലോ നാമ സമണോ, ബുദ്ധസ്സ അഗ്ഗസാവകോ;

വസീസതസഹസ്സേഹി, ബുദ്ധസന്തികുപാഗമി.

൪൯൭. ‘‘പദുമുത്തരോ ലോകവിദൂ, ആഹുതീനം പടിഗ്ഗഹോ;

ഭിക്ഖുസങ്ഘേ നിസീദിത്വാ, ഇമാ ഗാഥാ അഭാസഥ.

൪൯൮. ‘‘‘യോ മേ ദീപം പദീപേസി, പസന്നോ സേഹി പാണിഭി;

തമഹം കിത്തയിസ്സാമി, സുണാഥ മമ ഭാസതോ.

൪൯൯. ‘‘‘സട്ഠി കപ്പസഹസ്സാനി, ദേവലോകേ രമിസ്സതി;

സഹസ്സക്ഖത്തും രാജാ ച, ചക്കവത്തീ ഭവിസ്സതി.

സോളസമം ഭാണവാരം.

൫൦൦. ‘‘‘ഛത്തിസക്ഖത്തും ദേവിന്ദോ, ദേവരജ്ജം കരിസ്സതി;

പഥവിയം സത്തസതം, വിപുലം രജ്ജം കരിസ്സതി.

൫൦൧. ‘‘‘പദേസരജ്ജം വിപുലം, ഗണനാതോ അസങ്ഖിയം;

ഇമിനാ ദീപദാനേന, ദിബ്ബചക്ഖു ഭവിസ്സതി.

൫൦൨. ‘‘‘സമന്തതോ അട്ഠകോസം [അഡ്ഢകോസം (സീ. സ്യാ.)], പസ്സിസ്സതി അയം സദാ;

ദേവലോകാ ചവന്തസ്സ, നിബ്ബത്തന്തസ്സ ജന്തുനോ.

൫൦൩. ‘‘‘ദിവാ വാ യദി വാ രത്തിം, പദീപം ധാരയിസ്സതി;

ജായമാനസ്സ സത്തസ്സ, പുഞ്ഞകമ്മസമങ്ഗിനോ.

൫൦൪. ‘‘‘യാവതാ നഗരം ആസി, താവതാ ജോതയിസ്സതി;

ഉപപജ്ജതി യം യോനിം, ദേവത്തം അഥ മാനുസം.

൫൦൫. ‘‘‘അസ്സേവ ദീപദാനസ്സ, [അട്ഠദീപഫലേന ഹി; ഉപട്ഠിസ്സന്തിമം ജന്തും (സ്യാ.), അട്ഠ ദീപാ ഫലേന ഹി; ന ജഹിസ്സന്തി’മം ജന്തും (?)] അട്ഠദീപഫലേന ഹി;

ന ജയിസ്സന്തിമം ജന്തൂ [അട്ഠദീപഫലേന ഹി; ഉപട്ഠിസ്സന്തിമം ജന്തും (സ്യാ.), അട്ഠ ദീപാ ഫലേന ഹി; ന ജഹിസ്സന്തി’മം ജന്തും (?)], ദീപദാനസ്സിദം ഫലം.

൫൦൬. ‘‘‘കപ്പസതസഹസ്സമ്ഹി, ഓക്കാകകുലസമ്ഭവോ;

ഗോതമോ നാമ ഗോത്തേന, സത്ഥാ ലോകേ ഭവിസ്സതി.

൫൦൭. ‘‘‘തസ്സ ധമ്മേസു ദായാദോ, ഓരസോ ധമ്മനിമ്മിതോ;

സബ്ബാസവേ പരിഞ്ഞായ, നിബ്ബായിസ്സതിനാസവോ.

൫൦൮. ‘‘‘തോസയിത്വാന സമ്ബുദ്ധം, ഗോതമം സക്യപുങ്ഗവം;

അജിതോ നാമ നാമേന, ഹേസ്സതി സത്ഥു സാവകോ’.

൫൦൯. ‘‘സട്ഠി കപ്പസഹസ്സാനി, ദേവലോകേ രമിം അഹം;

തത്രാപി മേ ദീപസതം, ജോതതേ നിച്ചകാലികം [സബ്ബകാലികം (സീ.)].

൫൧൦. ‘‘ദേവലോകേ മനുസ്സേ വാ, നിദ്ധാവന്തി പഭാ മമ;

ബുദ്ധസേട്ഠം സരിത്വാന, ഭിയ്യോ ഹാസം ജനേസഹം.

൫൧൧. ‘‘തുസിതാഹം ചവിത്വാന, ഓക്കമിം മാതുകുച്ഛിയം;

ജായമാനസ്സ സന്തസ്സ, ആലോകോ വിപുലോ അഹു.

൫൧൨. ‘‘അഗാരാ അഭിനിക്ഖമ്മ, പബ്ബജിം അനഗാരിയം;

ബാവരിം ഉപസങ്കമ്മ, സിസ്സത്തം അജ്ഝുപാഗമിം.

൫൧൩. ‘‘ഹിമവന്തേ വസന്തോഹം, അസ്സോസിം ലോകനായകം;

ഉത്തമത്ഥം ഗവേസന്തോ, ഉപഗച്ഛിം വിനായകം.

൫൧൪. ‘‘ദന്തോ ബുദ്ധോ ദമേതാവീ, ഓഘതിണ്ണോ നിരൂപധി;

നിബ്ബാനം കഥയീ ബുദ്ധോ, സബ്ബദുക്ഖപ്പമോചനം.

൫൧൫. ‘‘തം മേ ആഗമനം സിദ്ധം, തോസിതോഹം മഹാമുനിം;

തിസ്സോ വിജ്ജാ അനുപ്പത്താ, കതം ബുദ്ധസ്സ സാസനം.

൫൧൬. ‘‘സതസഹസ്സിതോ കപ്പേ, യം ദീപമദദിം തദാ;

ദുഗ്ഗതിം നാഭിജാനാമി, ദീപദാനസ്സിദം ഫലം.

൫൧൭. ‘‘കിലേസാ ഝാപിതാ മയ്ഹം…പേ… വിഹരാമി അനാസവോ.

൫൧൮. ‘‘സ്വാഗതം വത മേ ആസി…പേ… കതം ബുദ്ധസ്സ സാസനം.

൫൧൯. ‘‘പടിസമ്ഭിദാ ചതസ്സോ…പേ… കതം ബുദ്ധസ്സ സാസനം’’.

ഇത്ഥം സുദം ആയസ്മാ അജിതോ ഥേരോ ഇമാ ഗാഥായോ അഭാസിത്ഥാതി.

അജിതത്ഥേരസ്സാപദാനം ദസമം.

പിലിന്ദവച്ഛവഗ്ഗോ ചത്താലീസമോ.

തസ്സുദ്ദാനം –

പിലിന്ദവച്ഛോ സേലോ ച, സബ്ബകിത്തീ മധുംദദോ;

കൂടാഗാരീ ബാകുലോ ച, ഗിരി സളലസവ്ഹയോ.

സബ്ബദോ അജിതോ ചേവ, ഗാഥായോ ഗണിതാ ഇഹ;

സതാനി പഞ്ച ഗാഥാനം, വീസതി ച തദുത്തരീതി.

അഥ വഗ്ഗുദ്ദാനം –

പദുമാരക്ഖദോ ചേവ, ഉമാ ഗന്ധോദകേന ച;

ഏകപദ്മ സദ്ദസഞ്ഞീ, മന്ദാരം ബോധിവന്ദകോ.

അവടഞ്ച പിലിന്ദി [ഏവമേവ ദിസ്സതി] ച, ഗാഥായോ ഗണിതാ ഇഹ;

ചതുസത്തതി ഗാഥായോ, ഏകാദസ സതാനി ച.

പദുമവഗ്ഗദസകം.