൧൦. സളലപുപ്ഫിയത്ഥേരഅപദാനം

൩൫. ‘‘ചന്ദഭാഗാനദീതീരേ, അഹോസിം കിന്നരോ തദാ;

തത്ഥദ്ദസം ദേവദേവം, ചങ്കമന്തം നരാസഭം.

൩൬. ‘‘ഓചിനിത്വാന സളലം, പുപ്ഫം ബുദ്ധസ്സദാസഹം;

ഉപസിങ്ഘി മഹാവീരോ, സളലം ദേവഗന്ധികം.

൩൭. ‘‘പടിഗ്ഗഹേത്വാ സമ്ബുദ്ധോ, വിപസ്സീ ലോകനായകോ;

ഉപസിങ്ഘി മഹാവീരോ, പേക്ഖമാനസ്സ മേ സതോ.

൩൮. ‘‘പസന്നചിത്തോ സുമനോ, വന്ദിത്വാ ദ്വിപദുത്തമം;

അഞ്ജലിം പഗ്ഗഹേത്വാന, പുന പബ്ബതമാരുഹിം.

൩൯. ‘‘ഏകനവുതിതോ കപ്പേ, യം പുപ്ഫമഭിപൂജയിം;

ദുഗ്ഗതിം നാഭിജാനാമി, ബുദ്ധപൂജായിദം ഫലം.

൪൦. ‘‘പടിസമ്ഭിദാ ചതസ്സോ…പേ… കതം ബുദ്ധസ്സ സാസനം’’.

ഇത്ഥം സുദം ആയസ്മാ സളലപുപ്ഫിയോ ഥേരോ ഇമാ ഗാഥായോ അഭാസിത്ഥാതി.

സളലപുപ്ഫിയത്ഥേരസ്സാപദാനം ദസമം.

മന്ദാരവപുപ്ഫിയവഗ്ഗോ സത്തതിംസതിമോ.