൫. നളാഗാരികത്ഥേരഅപദാനം

൩൧. ‘‘ഹിമവന്തസ്സാവിദൂരേ, ഹാരിതോ നാമ പബ്ബതോ;

സയമ്ഭൂ നാരദോ നാമ, രുക്ഖമൂലേ വസീ തദാ.

൩൨. ‘‘നളാഗാരം കരിത്വാന, തിണേന ഛാദയിം അഹം;

ചങ്കമം സോധയിത്വാന, സയമ്ഭുസ്സ അദാസഹം.

൩൩. ‘‘ചതുദ്ദസസു കപ്പേസു, ദേവലോകേ രമിം അഹം;

ചതുസത്തതിക്ഖത്തുഞ്ച, ദേവരജ്ജം അകാരയിം.

൩൪. ‘‘ചതുസത്തതി [സത്തസത്തതി (സീ.)] ക്ഖത്തുഞ്ച, ചക്കവത്തീ അഹോസഹം;

പദേസരജ്ജം വിപുലം, ഗണനാതോ അസങ്ഖിയം.

൩൫. ‘‘ഉബ്ബിദ്ധം ഭവനം മയ്ഹം, ഇന്ദലട്ഠീവ ഉഗ്ഗതം;

സഹസ്സഥമ്ഭം അതുലം, വിമാനം സപഭസ്സരം.

൩൬. ‘‘ദ്വേ സമ്പത്തീ അനുഭോത്വാ, സുക്കമൂലേന ചോദിതോ;

ഗോതമസ്സ ഭഗവതോ, സാസനേ പബ്ബജിം അഹം.

൩൭. ‘‘പധാനപഹിതത്തോമ്ഹി, ഉപസന്തോ നിരൂപധി;

നാഗോവ ബന്ധനം ഛേത്വാ, വിഹരാമി അനാസവോ.

൩൮. ‘‘പടിസമ്ഭിദാ ചതസ്സോ…പേ… കതം ബുദ്ധസ്സ സാസനം’’.

ഇത്ഥം സുദം ആയസ്മാ നളാഗാരികോ ഥേരോ ഇമാ ഗാഥായോ അഭാസിത്ഥാതി.

നളാഗാരികത്ഥേരസ്സാപദാനം പഞ്ചമം.