൨. തീണുപ്പലമാലിയത്ഥേരഅപദാനം

൧൧. ‘‘ചന്ദഭാഗാനദീതീരേ, അഹോസിം വാനരോ തദാ;

അദ്ദസം വിരജം ബുദ്ധം, നിസിന്നം പബ്ബതന്തരേ.

൧൨. ‘‘ഓഭാസേന്തം ദിസാ സബ്ബാ, സാലരാജംവ ഫുല്ലിതം;

ലക്ഖണബ്യഞ്ജനൂപേതം, ദിസ്വാ അത്തമനോ അഹും.

൧൩. ‘‘ഉദഗ്ഗചിത്തോ സുമനോ, പീതിയാ ഹട്ഠമാനസോ;

തീണി ഉപ്പലപുപ്ഫാനി, മത്ഥകേ അഭിരോപയിം.

൧൪. ‘‘പുപ്ഫാനി അഭിരോപേത്വാ, വിപസ്സിസ്സ മഹേസിനോ;

സഗാരവോ ഭവിത്വാന [ഗമിത്വാന (സീ.), നമിത്വാന (ക.)], പക്കാമിം ഉത്തരാമുഖോ.

൧൫. ‘‘ഗച്ഛന്തോ പടികുടികോ, വിപ്പസന്നേന ചേതസാ;

സേലന്തരേ പതിത്വാന [പപതിത്വാ (സ്യാ. ക.)], പാപുണിം ജീവിതക്ഖയം.

൧൬. ‘‘തേന കമ്മേന സുകതേന, ചേതനാപണിധീഹി ച;

ജഹിത്വാ മാനുസം ദേഹം [പുരിമം ജാതിം (?) ഉപരി ൩൮ വഗ്ഗേ തതിയാപദാനേ ഏവമേവ ദിസ്സതി], താവതിംസമഗച്ഛഹം.

൧൭. ‘‘സതാനം തീണിക്ഖത്തുഞ്ച, ദേവരജ്ജം അകാരയിം;

സതാനം പഞ്ചക്ഖത്തുഞ്ച, ചക്കവത്തീ അഹോസഹം.

൧൮. ‘‘ഏകനവുതിതോ കപ്പേ, യം പുപ്ഫമഭിപൂജയിം;

ദുഗ്ഗതിം നാഭിജാനാമി, ബുദ്ധപൂജായിദം ഫലം.

൧൯. ‘‘പടിസമ്ഭിദാ ചതസ്സോ…പേ… കതം ബുദ്ധസ്സ സാസനം’’.

ഇത്ഥം സുദം ആയസ്മാ തീണുപ്പലമാലിയോ [തിഉപ്പലമാലിയോ (സീ.)] ഥേരോ ഇമാ ഗാഥായോ അഭാസിത്ഥാതി.

തീണുപ്പലമാലിയത്ഥേരസ്സാപദാനം ദുതിയം.