൮. ഉത്തരേയ്യദായകത്ഥേരഅപദാനം

൯൦. ‘‘നഗരേ ഹംസവതിയാ, അഹോസിം ബ്രാഹ്മണോ തദാ;

അജ്ഝായകോ മന്തധരോ, തിണ്ണം വേദാന പാരഗൂ.

൯൧. ‘‘പുരക്ഖതോ സസിസ്സേഹി, ജാതിമാ ച സുസിക്ഖിതോ;

തോയാഭിസേചനത്ഥായ, നഗരാ നിക്ഖമിം തദാ.

൯൨. ‘‘പദുമുത്തരോ നാമ ജിനോ, സബ്ബധമ്മാന പാരഗൂ;

ഖീണാസവസഹസ്സേഹി, പാവിസീ നഗരം ജിനോ.

൯൩. ‘‘സുചാരുരൂപം ദിസ്വാന, ആനേഞ്ജകാരിതം വിയ;

പരിവുതം അരഹന്തേഹി, ദിസ്വാ ചിത്തം പസാദയിം.

൯൪. ‘‘സിരസ്മിം അഞ്ജലിം കത്വാ, നമസ്സിത്വാന സുബ്ബതം;

പസന്നചിത്തോ സുമനോ, ഉത്തരീയമദാസഹം.

൯൫. ‘‘ഉഭോ ഹത്ഥേഹി പഗ്ഗയ്ഹ, സാടകം ഉക്ഖിപിം അഹം;

യാവതാ ബുദ്ധപരിസാ, താവ ഛാദേസി സാടകോ.

൯൬. ‘‘പിണ്ഡചാരം ചരന്തസ്സ, മഹാഭിക്ഖുഗണാദിനോ;

ഛദം കരോന്തോ അട്ഠാസി, ഹാസയന്തോ മമം തദാ.

൯൭. ‘‘ഘരതോ നിക്ഖമന്തസ്സ, സയമ്ഭൂ അഗ്ഗപുഗ്ഗലോ;

വീഥിയംവ ഠിതോ സത്ഥാ, അകാ മേ [അകാസി (സ്യാ.)] അനുമോദനം.

൯൮. ‘‘പസന്നചിത്തോ സുമനോ, യോ മേ അദാസി സാടകം;

തമഹം കിത്തയിസ്സാമി, സുണോഥ മമ ഭാസതോ.

൯൯. ‘‘‘തിംസകപ്പസഹസ്സാനി, ദേവലോകേ രമിസ്സതി;

പഞ്ഞാസക്ഖത്തും ദേവിന്ദോ, ദേവരജ്ജം കരിസ്സതി.

൧൦൦. ‘‘‘ദേവലോകേ വസന്തസ്സ, പുഞ്ഞകമ്മസമങ്ഗിനോ;

സമന്താ യോജനസതം, ദുസ്സച്ഛന്നം ഭവിസ്സതി.

൧൦൧. ‘‘‘ഛത്തിംസക്ഖത്തും രാജാ ച, ചക്കവത്തീ ഭവിസ്സതി;

പദേസരജ്ജം വിപുലം, ഗണനാതോ അസങ്ഖിയം.

൧൦൨. ‘‘‘ഭവേ സംസരമാനസ്സ, പുഞ്ഞകമ്മസമങ്ഗിനോ;

മനസാ പത്ഥിതം സബ്ബം, നിബ്ബത്തിസ്സതി താവദേ.

൧൦൩. ‘‘‘കോസേയ്യകമ്ബലിയാനി [കോസേയ്യകമ്ബലീയാനി (സീ.)], ഖോമകപ്പാസികാനി ച;

മഹഗ്ഘാനി ച ദുസ്സാനി, പടിലച്ഛതിയം നരോ.

൧൦൪. ‘‘‘മനസാ പത്ഥിതം സബ്ബം, പടിലച്ഛതിയം നരോ;

ഏകദുസ്സസ്സ വിപാകം, അനുഭോസ്സതി സബ്ബദാ.

൧൦൫. ‘‘‘സോ പച്ഛാ പബ്ബജിത്വാന, സുക്കമൂലേന ചോദിതോ;

ഗോതമസ്സ ഭഗവതോ, ധമ്മം സച്ഛികരിസ്സതി’.

൧൦൬. ‘‘അഹോ മേ സുകതം കമ്മം, സബ്ബഞ്ഞുസ്സ മഹേസിനോ;

ഏകാഹം സാടകം ദത്വാ, പത്തോമ്ഹി അമതം പദം.

൧൦൭. ‘‘മണ്ഡപേ രുക്ഖമൂലേ വാ, വസതോ സുഞ്ഞകേ ഘരേ;

ധാരേതി ദുസ്സഛദനം, സമന്താ ബ്യാമതോ മമ.

൧൦൮. ‘‘അവിഞ്ഞത്തം നിവാസേമി [അവിഞ്ഞത്താനി സേവാമി (?)], ചീവരം പച്ചയഞ്ചഹം;

ലാഭീ [ലാഭിമ്ഹി (സ്യാ.)] അന്നസ്സ പാനസ്സ, ഉത്തരേയ്യസ്സിദം ഫലം.

൧൦൯. ‘‘സതസഹസ്സിതോ കപ്പേ, യം കമ്മമകരിം തദാ;

ദുഗ്ഗതിം നാഭിജാനാമി, വത്ഥദാനസ്സിദം ഫലം.

൧൧൦. ‘‘പടിസമ്ഭിദാ ചതസ്സോ…പേ… കതം ബുദ്ധസ്സ സാസനം’’.

ഇത്ഥം സുദം ആയസ്മാ ഉത്തരേയ്യദായകോ ഥേരോ ഇമാ ഗാഥായോ അഭാസിത്ഥാതി.

ഉത്തരേയ്യദായകത്ഥേരസ്സാപദാനം അട്ഠമം.