൬. പഭങ്കരത്ഥേരഅപദാനം

൫൩. ‘‘പദുമുത്തരഭഗവതോ, ലോകജേട്ഠസ്സ താദിനോ;

വിപിനേ ചേതിയം ആസി, വാളമിഗസമാകുലേ.

൫൪. ‘‘ന കോചി വിസഹി ഗന്തും, ചേതിയം അഭിവന്ദിതും;

തിണകട്ഠലതോനദ്ധം, പലുഗ്ഗം ആസി ചേതിയം.

൫൫. ‘‘വനകമ്മികോ തദാ ആസിം, പിതുമാതുമതേനഹം [പിതുപേതാമഹേനഹം (സീ.), പിതാപേതാമഹേനഹം (സ്യാ.)];

അദ്ദസം വിപിനേ ഥൂപം, ലുഗ്ഗം തിണലതാകുലം.

൫൬. ‘‘ദിസ്വാനാഹം ബുദ്ധഥൂപം, ഗരുചിത്തം ഉപട്ഠഹിം;

ബുദ്ധസേട്ഠസ്സ ഥൂപോയം, പലുഗ്ഗോ അച്ഛതീ വനേ.

൫൭. ‘‘നച്ഛന്നം നപ്പതിരൂപം, ജാനന്തസ്സ ഗുണാഗുണം;

ബുദ്ധഥൂപം അസോധേത്വാ, അഞ്ഞം കമ്മം പയോജയേ.

൫൮. ‘‘തിണകട്ഠഞ്ച വല്ലിഞ്ച, സോധയിത്വാന ചേതിയേ;

വന്ദിത്വാ അട്ഠ വാരാനി [അട്ഠ ഠാനാനി (ക.)], പടികുടികോ അഗച്ഛഹം.

൫൯. ‘‘തേന കമ്മേന സുകതേന, ചേതനാപണിധീഹി ച;

ജഹിത്വാ മാനുസം ദേഹം, താവതിംസമഗച്ഛഹം.

൬൦. ‘‘തത്ഥ മേ സുകതം ബ്യമ്ഹം, സോവണ്ണം സപഭസ്സരം;

സട്ഠിയോജനമുബ്ബിദ്ധം, തിംസയോജനവിത്ഥതം.

൬൧. ‘‘തിസതാനി ച വാരാനി, ദേവരജ്ജമകാരയിം;

പഞ്ചവീസതിക്ഖത്തുഞ്ച, ചക്കവത്തീ അഹോസഹം.

൬൨. ‘‘ഭവാഭവേ സംസരന്തോ, മഹാഭോഗം ലഭാമഹം;

ഭോഗേ മേ ഊനതാ നത്ഥി, സോധനായ ഇദം ഫലം.

൬൩. ‘‘സിവികാ ഹത്ഥിഖന്ധേന, വിപിനേ ഗച്ഛതോ മമ;

യം യം ദിസാഹം ഗച്ഛാമി, സരണം സമ്പതേ [സിജ്ഝതേ (ക.)] വനം.

൬൪. ‘‘ഖാണും വാ കണ്ടകം വാപി, നാഹം പസ്സാമി ചക്ഖുനാ;

പുഞ്ഞകമ്മേന സംയുത്തോ, സയമേവാപനീയരേ.

൬൫. ‘‘കുട്ഠം ഗണ്ഡോ കിലാസോ ച, അപമാരോ വിതച്ഛികാ;

ദദ്ദു കച്ഛു [കണ്ഡു (സ്യാ.)] ച മേ നത്ഥി, സോധനായ ഇദം ഫലം.

൬൬. ‘‘അഞ്ഞമ്പി മേ അച്ഛരിയം, ബുദ്ധഥൂപസ്സ സോധനേ [ബുദ്ധഥൂപമ്ഹി സോധിതേ (സ്യാ.)];

നാഭിജാനാമി മേ കായേ, ജാതം പിളകബിന്ദുകം.

൬൭. ‘‘അഞ്ഞമ്പി മേ അച്ഛരിയം, ബുദ്ധഥൂപമ്ഹി സോധിതേ [സബ്ബത്ഥപി ഏവമേവ ദിസ്സതി, തഥാ ഉപരിപി];

ദുവേ ഭവേ സംസരാമി, ദേവത്തേ അഥ മാനുസേ.

൬൮. ‘‘അഞ്ഞമ്പി മേ അച്ഛരിയം, ബുദ്ധഥൂപമ്ഹി സോധിതേ;

സുവണ്ണവണ്ണോ സബ്ബത്ഥ, സപ്പഭാസോ ഭവാമഹം.

൬൯. ‘‘അഞ്ഞമ്പി മേ അച്ഛരിയം, ബുദ്ധഥൂപമ്ഹി സോധിതേ;

അമനാപം വിവജ്ജതി, മനാപം ഉപതിട്ഠതി.

൭൦. ‘‘അഞ്ഞമ്പി മേ അച്ഛരിയം, ബുദ്ധഥൂപമ്ഹി സോധിതേ;

വിസുദ്ധം ഹോതി മേ ചിത്തം, ഏകഗ്ഗം സുസമാഹിതം.

൭൧. ‘‘അഞ്ഞമ്പി മേ അച്ഛരിയം, ബുദ്ധഥൂപമ്ഹി സോധിതേ;

ഏകാസനേ നിസീദിത്വാ, അരഹത്തമപാപുണിം.

൭൨. ‘‘സതസഹസ്സിതോ കപ്പേ, യം കമ്മമകരിം തദാ;

ദുഗ്ഗതിം നാഭിജാനാമി, സോധനായ ഇദം ഫലം.

൭൩. ‘‘പടിസമ്ഭിദാ ചതസ്സോ…പേ… കതം ബുദ്ധസ്സ സാസനം’’.

ഇത്ഥം സുദം ആയസ്മാ പഭങ്കരോ ഥേരോ ഇമാ ഗാഥായോ അഭാസിത്ഥാതി.

പഭങ്കരത്ഥേരസ്സാപദാനം ഛട്ഠം.