൮. സുമനാവേളിയത്ഥേരഅപദാനം

൬൪. ‘‘വേസ്സഭുസ്സ ഭഗവതോ, ലോകജേട്ഠസ്സ താദിനോ;

സബ്ബേ ജനാ സമാഗമ്മ, മഹാപൂജം കരോന്തി തേ.

൬൫. ‘‘സുധായ പിണ്ഡം കത്വാന, ആവേളം സുമനായഹം;

സീഹാസനസ്സ പുരതോ, അഭിരോപേസഹം തദാ.

൬൬. ‘‘സബ്ബേ ജനാ സമാഗമ്മ, പേക്ഖന്തി പുപ്ഫമുത്തമം;

കേനിദം പൂജിതം പുപ്ഫം, ബുദ്ധസേട്ഠസ്സ താദിനോ.

൬൭. ‘‘തേന ചിത്തപ്പസാദേന, നിമ്മാനം ഉപപജ്ജഹം;

അനുഭോമി [അനുഭോസിം (സീ.)] സകം കമ്മം, പുബ്ബേ സുകതമത്തനോ.

൬൮. ‘‘യം യം യോനുപപജ്ജാമി, ദേവത്തം അഥ മാനുസം;

സബ്ബേസാനം പിയോ ഹോമി, പുപ്ഫപൂജായിദം ഫലം.

൬൯. ‘‘നാഭിജാനാമി കായേന, വാചായ ഉദ ചേതസാ;

സംയതാനം തപസ്സീനം, കതം അക്കോസിതം മയാ.

൭൦. ‘‘തേന സുചരിതേനാഹം, ചിത്തസ്സ പണിധീഹി ച;

സബ്ബേസം പൂജിതോ ഹോമി, അനക്കോസസ്സിദം ഫലം.

൭൧. ‘‘ഇതോ ഏകാദസേ കപ്പേ, സഹസ്സാരോസി ഖത്തിയോ;

സത്തരതനസമ്പന്നോ, ചക്കവത്തീ മഹബ്ബലോ.

൭൨. ‘‘പടിസമ്ഭിദാ ചതസ്സോ…പേ… കതം ബുദ്ധസ്സ സാസനം’’.

ഇത്ഥം സുദം ആയസ്മാ സുമനാവേളിയോ ഥേരോ ഇമാ ഗാഥായോ അഭാസിത്ഥാതി.

സുമനാവേളിയത്ഥേരസ്സാപദാനം അട്ഠമം.