൫. നിമിത്തസഞ്ഞകത്ഥേരഅപദാനം

൨൮. ‘‘ചന്ദഭാഗാനദീതീരേ, വസാമി അസ്സമേ അഹം;

സുവണ്ണമിഗമദ്ദക്ഖിം, ചരന്തം വിപിനേ അഹം.

൨൯. ‘‘മിഗേ ചിത്തം പസാദേത്വാ, ലോകജേട്ഠം അനുസ്സരിം;

തേന ചിത്തപ്പസാദേന, അഞ്ഞേ ബുദ്ധേ അനുസ്സരിം.

൩൦. ‘‘അബ്ഭതീതാ ച യേ ബുദ്ധാ, വത്തമാനാ അനാഗതാ;

ഏവമേവം വിരോചന്തി, മിഗരാജാവ തേ തയോ.

൩൧. ‘‘ചതുന്നവുതിതോ കപ്പേ, യം സഞ്ഞമലഭിം തദാ;

ദുഗ്ഗതിം നാഭിജാനാമി, ബുദ്ധസഞ്ഞായിദം ഫലം.

൩൨. ‘‘സത്തവീസേ ഇതോ കപ്പേ, ഏകോ ആസിം മഹീപതി;

അരഞ്ഞസത്ഥോ നാമേന, ചക്കവത്തീ മഹബ്ബലോ.

൩൩. ‘‘പടിസമ്ഭിദാ ചതസ്സോ…പേ… കതം ബുദ്ധസ്സ സാസനം’’.

ഇത്ഥം സുദം ആയസ്മാ നിമിത്തസഞ്ഞകോ ഥേരോ ഇമാ ഗാഥായോ അഭാസിത്ഥാതി.

നിമിത്തസഞ്ഞകത്ഥേരസ്സാപദാനം പഞ്ചമം.