൧. ഉമാപുപ്ഫിയത്ഥേരഅപദാനം

൧. ‘‘സമാഹിതം സമാപന്നം, സിദ്ധത്ഥമപരാജിതം;

സമാധിനാ ഉപവിട്ഠം, അദ്ദസാഹം നരുത്തമം.

൨. ‘‘ഉമാപുപ്ഫം ഗഹേത്വാന, ബുദ്ധസ്സ അഭിരോപയിം;

സബ്ബപുപ്ഫാ ഏകസീസാ, ഉദ്ധംവണ്ടാ അധോമുഖാ.

൩. ‘‘സുചിത്താ വിയ തിട്ഠന്തേ, ആകാസേ പുപ്ഫസന്ഥരാ;

തേന ചിത്തപ്പസാദേന, തുസിതം ഉപപജ്ജഹം.

൪. ‘‘ചതുന്നവുതിതോ കപ്പേ, യം പുപ്ഫമഭിപൂജയിം;

ദുഗ്ഗതിം നാഭിജാനാമി, ബുദ്ധപൂജായിദം ഫലം.

൫. ‘‘പഞ്ചപഞ്ഞാസിതോ കപ്പേ, ഏകോ ആസിം മഹീപതി;

സമന്തഛദനോ നാമ, ചക്കവത്തീ മഹബ്ബലോ.

൬. ‘‘പടിസമ്ഭിദാ ചതസ്സോ, വിമോക്ഖാപി ച അട്ഠിമേ;

ഛളഭിഞ്ഞാ സച്ഛികതാ, കതം ബുദ്ധസ്സ സാസനം.

ഇത്ഥം സുദം ആയസ്മാ ഉമാപുപ്ഫിയോ ഥേരോ ഇമാ ഗാഥായോ അഭാസിത്ഥാതി.

ഉമാപുപ്ഫിയത്ഥേരസ്സാപദാനം പഠമം.