൯. കന്ദലിപുപ്ഫിയത്ഥേരഅപദാനം

൪൭. ‘‘സിന്ധുയാ നദിയാ തീരേ, അഹോസിം കസ്സകോ തദാ;

പരകമ്മായനേ യുത്തോ, പരഭത്തം അപസ്സിതോ.

൪൮. ‘‘സിന്ധും അനുചരന്തോഹം, സിദ്ധത്ഥം ജിനമദ്ദസം;

സമാധിനാ നിസിന്നംവ, സതപത്തംവ പുപ്ഫിതം.

൪൯. ‘‘സത്ത കന്ദലിപുപ്ഫാനി, വണ്ടേ ഛേത്വാനഹം തദാ;

മത്ഥകേ അഭിരോപേസിം, ബുദ്ധസ്സാദിച്ചബന്ധുനോ.

൫൦. ‘‘സുവണ്ണവണ്ണം സമ്ബുദ്ധം, അനുകൂലേ സമാഹിതം;

തിധാപഭിന്നമാതങ്ഗം, കുഞ്ജരംവ ദുരാസദം.

൫൧. ‘‘തമഹം ഉപഗന്ത്വാന, നിപകം ഭാവിതിന്ദ്രിയം;

അഞ്ജലിം പഗ്ഗഹേത്വാന, അവന്ദിം സത്ഥുനോ അഹം.

൫൨. ‘‘ചതുന്നവുതിതോ കപ്പേ, യം പുപ്ഫമഭിരോപയിം;

ദുഗ്ഗതിം നാഭിജാനാമി, ബുദ്ധപൂജായിദം ഫലം.

൫൩. ‘‘പടിസമ്ഭിദാ ചതസ്സോ…പേ… കതം ബുദ്ധസ്സ സാസനം’’.

ഇത്ഥം സുദം ആയസ്മാ കന്ദലിപുപ്ഫിയോ ഥേരോ ഇമാ ഗാഥായോ അഭാസിത്ഥാതി.

കന്ദലിപുപ്ഫിയത്ഥേരസ്സാപദാനം നവമം.