൪. സത്തപദുമിയത്ഥേരഅപദാനം

൧൪. ‘‘നദീകൂലേ വസാമഹം, നേസാദോ നാമ ബ്രാഹ്മണോ;

സതപത്തേഹി പുപ്ഫേഹി, സമ്മജ്ജിത്വാന അസ്സമം.

൧൫. ‘‘സുവണ്ണവണ്ണം സമ്ബുദ്ധം, സിദ്ധത്ഥം ലോകനായകം;

ദിസ്വാ നഭേന [വനേന (സ്യാ. ക.)] ഗച്ഛന്തം, ഹാസോ മേ ഉദപജ്ജഥ.

൧൬. ‘‘പച്ചുഗ്ഗന്ത്വാന സമ്ബുദ്ധം, ലോകജേട്ഠം നരാസഭം;

അസ്സമം അതിനാമേത്വാ, ജലജഗ്ഗേഹി ഓകിരിം.

൧൭. ‘‘ചതുന്നവുതിതോ കപ്പേ, യം പുപ്ഫമഭിരോപയിം;

ദുഗ്ഗതിം നാഭിജാനാമി, ബുദ്ധപൂജായിദം ഫലം.

൧൮. ‘‘ഇതോ തേ സത്തമേ കപ്പേ, ചതുരോ പാദപാവരാ;

സത്തരതനസമ്പന്നാ, ചക്കവത്തീ മഹബ്ബലാ.

൧൯. ‘‘പടിസമ്ഭിദാ ചതസ്സോ…പേ… കതം ബുദ്ധസ്സ സാസനം’’.

ഇത്ഥം സുദം ആയസ്മാ സത്തപദുമിയോ ഥേരോ ഇമാ ഗാഥായോ അഭാസിത്ഥാതി.

സത്തപദുമിയത്ഥേരസ്സാപദാനം ചതുത്ഥം.