൭. ആരാമദായകത്ഥേരഅപദാനം

൩൨. ‘‘സിദ്ധത്ഥസ്സ ഭഗവതോ, ആരാമോ രോപിതോ മയാ;

സന്ദച്ഛായേസു [സീതഛായേസു (സ്യാ.), സന്തച്ഛായേസു (ക.)] രുക്ഖേസു, ഉപാസന്തേസു പക്ഖിസു.

൩൩. ‘‘അദ്ദസം വിരജം ബുദ്ധം, ആഹുതീനം പടിഗ്ഗഹം;

ആരാമം അഭിനാമേസിം, ലോകജേട്ഠം നരാസഭം.

൩൪. ‘‘ഹട്ഠോ ഹട്ഠേന ചിത്തേന, ഫലം പുപ്ഫമദാസഹം;

തതോ ജാതപ്പസാദോവ, തം വനം പരിണാമയിം.

൩൫. ‘‘ബുദ്ധസ്സ യമിദം ദാസിം, വിപ്പസന്നേന ചേതസാ;

ഭവേ നിബ്ബത്തമാനമ്ഹി, നിബ്ബത്തതി ഫലം മമ.

൩൬. ‘‘ചതുന്നവുതിതോ കപ്പേ, യം ആരാമമദം തദാ;

ദുഗ്ഗതിം നാഭിജാനാമി, ആരാമസ്സ ഇദം ഫലം.

൩൭. ‘‘സത്തതിംസേ ഇതോ കപ്പേ, സത്താസും മുദുസീതലാ;

സത്തരതനസമ്പന്നാ, ചക്കവത്തീ മഹബ്ബലാ.

൩൮. ‘‘പടിസമ്ഭിദാ ചതസ്സോ…പേ… കതം ബുദ്ധസ്സ സാസനം’’.

ഇത്ഥം സുദം ആയസ്മാ ആരാമദായകോ ഥേരോ ഇമാ ഗാഥായോ അഭാസിത്ഥാതി.

ആരാമദായകത്ഥേരസ്സാപദാനം സത്തമം.