൪. ധമ്മസഞ്ഞകത്ഥേരഅപദാനം

൧൩. ‘‘വിപസ്സിനോ ഭഗവതോ, മഹാബോധിമഹോ അഹു;

രുക്ഖട്ഠസ്സേവ സമ്ബുദ്ധോ, [രുക്ഖട്ഠേയേവ സമ്ബുദ്ധേ (സീ.), രുക്ഖട്ഠോ ഇവ സമ്ബുദ്ധോ (അട്ഠ.) ഏത്ഥ രുക്ഖട്ഠസ്സേവ ബോധിമഹകാരജനസ്സ സമ്ബുദ്ധോ ചതുസച്ചം പകാസേതീതി അത്ഥോപി സക്കാ ഞാതും] ലോകജേട്ഠോ നരാസഭോ [ലോകജേട്ഠേ നരാസഭേ (സീ.)].

൧൪. ‘‘ഭഗവാ തമ്ഹി സമയേ, ഭിക്ഖുസങ്ഘപുരക്ഖതോ;

ചതുസച്ചം പകാസേതി, വാചാസഭിമുദീരയം.

൧൫. ‘‘സങ്ഖിത്തേന ച ദേസേന്തോ, വിത്ഥാരേന ച ദേസയം [ദേസയി (സ്യാ.), ഭാസതി (ക.)];

വിവട്ടച്ഛദോ സമ്ബുദ്ധോ, നിബ്ബാപേസി മഹാജനം.

൧൬. ‘‘തസ്സാഹം ധമ്മം സുത്വാന, ലോകജേട്ഠസ്സ താദിനോ;

വന്ദിത്വാ സത്ഥുനോ പാദേ, പക്കാമിം ഉത്തരാമുഖോ.

൧൭. ‘‘ഏകനവുതിതോ കപ്പേ, യം ധമ്മമസുണിം തദാ;

ദുഗ്ഗതിം നാഭിജാനാമി, ധമ്മസവസ്സിദം ഫലം.

൧൮. ‘‘തേത്തിംസമ്ഹി ഇതോ കപ്പേ, ഏകോ ആസിം മഹീപതി;

സുതവാ നാമ നാമേന, ചക്കവത്തീ മഹബ്ബലോ.

൧൯. ‘‘പടിസമ്ഭിദാ ചതസ്സോ…പേ… കതം ബുദ്ധസ്സ സാസനം’’.

ഇത്ഥം സുദം ആയസ്മാ ധമ്മസഞ്ഞകോ ഥേരോ ഇമാ ഗാഥായോ അഭാസിത്ഥാതി.

ധമ്മസഞ്ഞകത്ഥേരസ്സാപദാനം ചതുത്ഥം.