൮. സരണഗമനിയത്ഥേരഅപദാനം

൩൬. ‘‘പബ്ബതേ ഹിമവന്തമ്ഹി, അഹോസിം ലുദ്ദകോ തദാ;

വിപസ്സിം അദ്ദസം ബുദ്ധം, ലോകജേട്ഠം നരാസഭം.

൩൭. ‘‘ഉപാസിത്വാന സമ്ബുദ്ധം, വേയ്യാവച്ചമകാസഹം;

സരണഞ്ച ഉപാഗച്ഛിം, ദ്വിപദിന്ദസ്സ താദിനോ.

൩൮. ‘‘ഏകനവുതിതോ കപ്പേ, സരണം ഉപഗച്ഛഹം;

ദുഗ്ഗതിം നാഭിജാനാമി, സരണാഗമനപ്ഫലം.

൩൯. ‘‘പടിസമ്ഭിദാ ചതസ്സോ…പേ… കതം ബുദ്ധസ്സ സാസനം’’.

ഇത്ഥം സുദം ആയസ്മാ സരണഗമനിയോ ഥേരോ ഇമാ ഗാഥായോ അഭാസിത്ഥാതി.

സരണഗമനിയത്ഥേരസ്സാപദാനം അട്ഠമം.