൧൦. ഖോമദായകത്ഥേരഅപദാനം

൧൮൪. ‘‘നഗരേ ബന്ധുമതിയാ, അഹോസിം വാണിജോ തദാ;

തേനേവ ദാരം പോസേമി, രോപേമി ബീജസമ്പദം.

൧൮൫. ‘‘രഥിയം പടിപന്നസ്സ, വിപസ്സിസ്സ മഹേസിനോ;

ഏകം ഖോമം മയാ ദിന്നം, കുസലത്ഥായ സത്ഥുനോ.

൧൮൬. ‘‘ഏകനവുതിതോ കപ്പേ, യം ഖോമമദദിം തദാ;

ദുഗ്ഗതിം നാഭിജാനാമി, ഖോമദാനസ്സിദം ഫലം.

൧൮൭. ‘‘സത്തരസേ [സത്തവീസേ (സീ. സ്യാ.)] ഇതോ കപ്പേ, ഏകോ സിന്ധവസന്ധനോ;

സത്തരതനസമ്പന്നോ, ചതുദീപമ്ഹി ഇസ്സരോ.

൧൮൮. ‘‘പടിസമ്ഭിദാ ചതസ്സോ, വിമോക്ഖാപി ച അട്ഠിമേ;

ഛളഭിഞ്ഞാ സച്ഛികതാ, കതം ബുദ്ധസ്സ സാസനം’’.

ഇത്ഥം സുദം ആയസ്മാ ഖോമദായകോ ഥേരോ ഇമാ ഗാഥായോ അഭാസിത്ഥാതി.

ഖോമദായകത്ഥേരസ്സാപദാനം ദസമം.

തസ്സുദ്ദാനം –

സുസൂതി ഉപവാനോ ച, സരണോ സീലഗാഹകോ;

അന്നസംസാവകോ ഖോമദായീ ച, ദസേവ തതിയേ ഗണേ;

അഞ്ജലീ ഖോമദായീ ച, ദസേവ തതിയേ ഗണേ;

പഞ്ചാലീസീതിസതം വുത്താ, ഗാഥായോ സബ്ബപിണ്ഡിതാ.

സുഭൂതിവഗ്ഗോ തതിയോ.