൧. സുവണ്ണബിബ്ബോഹനിയത്ഥേരഅപദാനം

൧. ‘‘ഏകാസനം അഹമദം, പസന്നോ സേഹി പാണിഭി;

ബിബ്ബോഹനഞ്ച [ബിമ്ബോഹനഞ്ച (സീ. പീ.)] പാദാസിം, ഉത്തമത്ഥസ്സ പത്തിയാ.

൨. ‘‘ഏകനവുതിതോ കപ്പേ, ബിബ്ബോഹനമദാസഹം;

ദുഗ്ഗതിം നാഭിജാനാമി, ബിബ്ബോഹനസ്സിദം ഫലം.

൩. ‘‘ഇതോ തേസട്ഠിമേ കപ്പേ, അസമോ നാമ ഖത്തിയോ;

സത്തരതനസമ്പന്നോ, ചക്കവത്തീ മഹബ്ബലോ.

൪. ‘‘പടിസമ്ഭിദാ ചതസ്സോ, വിമോക്ഖാപി ച അട്ഠിമേ;

ഛളഭിഞ്ഞാ സച്ഛികതാ, കതം ബുദ്ധസ്സ സാസനം’’.

ഇത്ഥം സുദം ആയസ്മാ സുവണ്ണബിബ്ബോഹനിയോ ഥേരോ ഇമാ ഗാഥായോ അഭാസിത്ഥാതി.

സുവണ്ണബിബ്ബോഹനിയത്ഥേരസ്സാപദാനം പഠമം.