൭. താലവണ്ടദായകത്ഥേരഅപദാനം

൩൧. ‘‘താലവണ്ടം മയാ ദിന്നം, തിസ്സസ്സാദിച്ചബന്ധുനോ;

ഗിമ്ഹനിബ്ബാപനത്ഥായ, പരിളാഹോപസന്തിയാ.

൩൨. ‘‘സന്നിബ്ബാപേമി രാഗഗ്ഗിം, ദോസഗ്ഗിഞ്ച തദുത്തരിം;

നിബ്ബാപേമി ച മോഹഗ്ഗിം, താലവണ്ടസ്സിദം ഫലം.

൩൩. ‘‘കിലേസാ ഝാപിതാ മയ്ഹം, ഭവാ സബ്ബേ സമൂഹതാ;

ധാരേമി അന്തിമം ദേഹം, സമ്മാസമ്ബുദ്ധസാസനേ.

൩൪. ‘‘ദ്വേനവുതേ ഇതോ കപ്പേ, യം കമ്മമകരിം തദാ;

ദുഗ്ഗതിം നാഭിജാനാമി, താലവണ്ടസ്സിദം ഫലം.

൩൫. ‘‘തേസട്ഠിമ്ഹി ഇതോ കപ്പേ, മഹാനാമസനാമകോ;

സത്തരതനസമ്പന്നോ, ചക്കവത്തീ മഹബ്ബലോ.

൩൬. ‘‘പടിസമ്ഭിദാ ചതസ്സോ…പേ… കതം ബുദ്ധസ്സ സാസനം’’.

ഇത്ഥം സുദം ആയസ്മാ താലവണ്ടദായകോ ഥേരോ ഇമാ ഗാഥായോ അഭാസിത്ഥാതി.

താലവണ്ടദായകത്ഥേരസ്സാപദാനം സത്തമം.