൭. ഉപസേനവങ്ഗന്തപുത്തത്ഥേരഅപദാനം

൮൬. ‘‘പദുമുത്തരം ഭഗവന്തം, ലോകജേട്ഠം നരാസഭം;

പബ്ഭാരമ്ഹി നിസീദന്തം, ഉപഗച്ഛിം നരുത്തമം.

൮൭. ‘‘കണികാരപുപ്ഫം [കണികാരം പുപ്ഫിതം (സീ. സ്യാ.)] ദിസ്വാ, വണ്ടേ ഛേത്വാനഹം തദാ;

അലങ്കരിത്വാ ഛത്തമ്ഹി, ബുദ്ധസ്സ അഭിരോപയിം.

൮൮. ‘‘പിണ്ഡപാതഞ്ച പാദാസിം, പരമന്നം സുഭോജനം;

ബുദ്ധേന നവമേ തത്ഥ, സമണേ അട്ഠ ഭോജയിം.

൮൯. ‘‘അനുമോദി മഹാവീരോ, സയമ്ഭൂ അഗ്ഗപുഗ്ഗലോ;

ഇമിനാ ഛത്തദാനേന, പരമന്നപവേച്ഛനാ.

൯൦. ‘‘തേന ചിത്തപ്പസാദേന, സമ്പത്തിമനുഭോസ്സസി;

ഛത്തിംസക്ഖത്തും ദേവിന്ദോ, ദേവരജ്ജം കരിസ്സതി.

൯൧. ‘‘ഏകവീസതിക്ഖത്തുഞ്ച, ചക്കവത്തീ ഭവിസ്സതി;

പദേസരജ്ജം വിപുലം, ഗണനാതോ അസങ്ഖിയം.

൯൨. ‘‘സതസഹസ്സിതോ കപ്പേ, ഓക്കാകകുലസമ്ഭവോ;

ഗോതമോ നാമ ഗോത്തേന, സത്ഥാ ലോകേ ഭവിസ്സതി [യം വദന്തി സുമേധോതി, ഭൂരിപഞ്ഞം സുമേധസം; കപ്പേതോ സതസഹസ്സേ, ഏസ ബുദ്ധോ ഭവിസ്സതി; (ക.)].

൯൩. ‘‘സാസനേ ദിബ്ബമാനമ്ഹി, മനുസ്സത്തം ഗമിസ്സതി;

തസ്സ ധമ്മേസു ദായാദോ, ഓരസോ ധമ്മനിമ്മിതോ.

൯൪. ‘‘ഉപസേനോതി നാമേന, ഹേസ്സതി സത്ഥു സാവകോ;

[ഇദം പാദദ്വയം ഥേരഗാഥാഅട്ഠകഥായമേവ ദിസ്സതി] സമന്തപാസാദികത്താ, അഗ്ഗട്ഠാനേ ഠപേസ്സതി

[ഇദം പാദദ്വയം ഥേരഗാഥാഅട്ഠകഥായമേവ ദിസ്സതി].

൯൫. ‘‘ചരിമം വത്തതേ മയ്ഹം, ഭവാ സബ്ബേ സമൂഹതാ;

ധാരേമി അന്തിമം ദേഹം, ജേത്വാ മാരം സവാഹനം [സവാഹിനിം (?)].

൯൬. ‘‘പടിസമ്ഭിദാ ചതസ്സോ, വിമോക്ഖാപി ച അട്ഠിമേ;

ഛളഭിഞ്ഞാ സച്ഛികതാ, കതം ബുദ്ധസ്സ സാസനം’’.

ഇത്ഥം സുദം ആയസ്മാ ഉപസേനോ വങ്ഗന്തപുത്തോ ഥേരോ ഇമാ ഗാഥായോ അഭാസിത്ഥാതി.

ഉപസേനവങ്ഗന്തപുത്തത്ഥേരസ്സാപദാനം സത്തമം.

തതിയഭാണവാരം.