൩. നന്ദത്ഥേരഅപദാനം

൨൭. ‘‘പദുമുത്തരസ്സ ഭഗവതോ, ലോകജേട്ഠസ്സ താദിനോ;

വത്ഥം ഖോമം മയാ ദിന്നം, സയമ്ഭുസ്സ മഹേസിനോ.

൨൮. ‘‘തം മേ ബുദ്ധോ വിയാകാസി, ജലജുത്തരനാമകോ;

‘ഇമിനാ വത്ഥദാനേന, ഹേമവണ്ണോ ഭവിസ്സസി.

൨൯. ‘‘‘ദ്വേ സമ്പത്തീ അനുഭോത്വാ, കുസലമൂലേഹി ചോദിതോ;

ഗോതമസ്സ ഭഗവതോ, കനിട്ഠോ ത്വം ഭവിസ്സസി.

൩൦. ‘‘‘രാഗരത്തോ സുഖസീലോ, കാമേസു ഗേധമായുതോ;

ബുദ്ധേന ചോദിതോ സന്തോ, തദാ [തതോ (സ്യാ.)] ത്വം പബ്ബജിസ്സസി.

൩൧. ‘‘‘പബ്ബജിത്വാന ത്വം തത്ഥ, കുസലമൂലേന ചോദിതോ;

സബ്ബാസവേ പരിഞ്ഞായ, നിബ്ബായിസ്സസിനാസവോ’.

൩൨. ‘‘സത്ത [സത (സ്യാ.)] കപ്പസഹസ്സമ്ഹി, ചതുരോ ചേളനാമകാ;

സട്ഠി കപ്പസഹസ്സമ്ഹി, ഉപചേലാ ചതുജ്ജനാ.

൩൩. ‘‘പഞ്ച കപ്പസഹസ്സമ്ഹി, ചേളാവ ചതുരോ ജനാ;

സത്തരതനസമ്പന്നാ, ചതുദീപമ്ഹി ഇസ്സരാ.

൩൪. ‘‘പടിസമ്ഭിദാ ചതസ്സോ, വിമോക്ഖാപി ച അട്ഠിമേ;

ഛളഭിഞ്ഞാ സച്ഛികതാ, കതം ബുദ്ധസ്സ സാസനം’’.

ഇത്ഥം സുദം ആയസ്മാ നന്ദോ ഥേരോ ഇമാ ഗാഥായോ അഭാസിത്ഥാതി.

നന്ദത്ഥേരസ്സാപദാനം തതിയം.