൩. ദ്വേരതനിയത്ഥേരഅപദാനം

൧൨. ‘‘മിഗലുദ്ദോ പുരേ ആസിം, അരഞ്ഞേ കാനനേ അഹം;

അദ്ദസം വിരജം ബുദ്ധം, ആഹുതീനം പടിഗ്ഗഹം.

൧൩. ‘‘മംസപേസി മയാ ദിന്നാ, വിപസ്സിസ്സ മഹേസിനോ;

സദേവകസ്മിം ലോകസ്മിം, ഇസ്സരം കാരയാമഹം.

൧൪. ‘‘ഇമിനാ മംസദാനേന, രതനം നിബ്ബത്തതേ മമ;

ദുവേമേ രതനാ ലോകേ, ദിട്ഠധമ്മസ്സ പത്തിയാ.

൧൫. ‘‘തേഹം സബ്ബേ അനുഭോമി, മംസദാനസ്സ സത്തിയാ;

ഗത്തഞ്ച മുദുകം മയ്ഹം, പഞ്ഞാ നിപുണവേദനീ.

൧൬. ‘‘ഏകനവുതിതോ കപ്പേ, യം മംസമദദിം തദാ;

ദുഗ്ഗതിം നാഭിജാനാമി, മംസദാനസ്സിദം ഫലം.

൧൭. ‘‘ഇതോ ചതുത്ഥകേ കപ്പേ, ഏകോ ആസിം ജനാധിപോ;

മഹാരോഹിതനാമോ സോ, ചക്കവത്തീ മഹബ്ബലോ.

൧൮. ‘‘പടിസമ്ഭിദാ ചതസ്സോ…പേ… കതം ബുദ്ധസ്സ സാസനം’’.

ഇത്ഥം സുദം ആയസ്മാ ദ്വേരതനിയോ [ദ്വിരതനിയോ (സീ.)] ഥേരോ ഇമാ ഗാഥായോ അഭാസിത്ഥാതി.

ദ്വേരതനിയത്ഥേരസ്സാപദാനം തതിയം.

ദസമം ഭാണവാരം.